हरि आचार्य कपिलवस्तु, बैशाख १३
नगरपालिकामा विश्व महामारीको रुपमा फैलिएको कोरोना भाईरस (कोभिड १९) को संक्रमण फैलन सक्ने भन्दै कुखुरा तथा अण्डामा रोक लगाउन वाणगंगा अण्डा उत्पादक किसान संघले माग गरेको छ । वाणगंगा नगरपालिकामा अन्य देशका माछा मासु, तरकारी तथा फलफुलमा रोक प्रतिबन्ध लगाएपनि कुखुरा तथा अण्डामा रोक नलगाउँदा एकातिर रोग फैलन सक्ने उच्च जोखिम रहेको र अर्कोतिर स्थानीय कुखुरा तथा अण्डा पालक कृषकहरु मर्कामा परेको भन्दै ध्यानाकर्षण पत्र मार्फत उक्त माग गरिएको वाणगंगा अण्डा उत्पादक किसान संघका अध्यक्ष आत्माराम बेल्बासेले बताएका छन् ।

ध्यानाकर्षण पत्रमा कोरोना भाईरसका कारण विश्व महामारी रोक्न देशब्यापि रुपमा लकडाउन जारी रहेको अवस्थामा अन्य छिमेकी पालिकाहरुमा तरकारी, फलफुल, माछा, मासु, कुखुरा अण्डामा रोक लगाईएको र यस नगरपालिका तरकारी, फलफुलमा आत्मनिर्भर रहेता पनि कुखुरा तथा अण्डामा रोक नलगाईएको हुँदा रोग फैलन सक्ने जोखिम तथा स्थानीय कृषकहरु मर्कामा परेको उल्लेख गरिएको छ । त्यसैले यस नगरपालिकामा पनि कुखुरा तथा अण्डामा पुर्ण रुपमा कडाईका साथ प्रतिबन्ध लगाउनुपर्ने भन्दै अध्यक्ष बेल्बासेको हस्ताक्षरमा ध्यानाकर्र्षण पत्र सहित माग गरिएको छ ।