१३ जेठ, बुटवल ।
बुटवलमा कोरोना संक्रमणबाट एक हप्ताको अवधिमा एकै परिवारका तीनजनाको मृत्यु भएको छ । बुटवल उपमहानगरपालिका–१० कालिकानगरमा एकै परिवारका पाँच सदस्यमध्ये बाबु आमा र छोराको एक हप्ता अवधिमा मृत्यु भएको हो । वैैशाख अन्तिम साता उक्त परिवारका आमा र छोरामा कोरोना संक्रमण पुष्टि भएको थियो ।

संक्रमणपछि ३९ वर्षका छोराको अवस्था गम्भीर भएपछि युनिभर्सल मेडिकल कलेजमा भर्ना गरिएको थियो । ५५ वर्षीया आमाको स्वास्थ्यमा भने खासै जटिल समस्या थिएन । त्यसैले उनी घरमै आइसोलेसनमा थिइन् । तर जेठ ५ गते उनको घरमै मृत्यु भयो ।

त्यसबीचमै ६९ वर्षीय बुबामा पनि कोरोना संक्रमण भयो र उपचारका लागि युनिभर्सल मेडिकल कलेजमा भर्ना गरियो । उपचारकै क्रममा जेठ ७ गते छोराको र जेठ १२ गते बुबाका मृत्यु भयो । एक हप्तामा एकै परिवारका तीनजनाको मृत्युको घटनाले स्तब्ध बनाएको बुटवल उपमहानगरपालिका १० का अध्यक्ष पदमबहादुर थापाले बताए ।

संक्रमित भएपछि समयमै अस्पताल पुर्‍याए पनि अकल्पनीय घटना भएको उनले बताए । ‘उहाँहरुलाई अस्पतालमा बेड र अक्सिजन, औषधिका लागि पैसाको कुनै कमी हुन दिएका थिएनौं’ वडा अध्यक्ष थापाले भने, ‘उपचारका सबै विधि र सबै प्रयास गर्दा पनि बचाउन सकिएन ।’

यस्तै उक्त परिवारका ५ सदस्यमध्ये ३९ वर्षकी बुहारी पनि संक्रमित भएर बुटवलको एक आइसोलेसन सेन्टरमा छिन् । उनका ६ वर्षीय छोरामा भने कोरोना संक्रमण देखिएको छैन । उनी आफन्तको घरमा छन् ।