लुदअ, कपिलवस्तु
लिलाम नहुँदा कपिलवस्तुको सुठौली भन्सार कार्यालयमा करोडौका सवारी साधन कवाड बनेका छन् । विभिन्न क्षेत्रबाट प्रहरीले पक्राउ गरी भन्सार चलान गरेका सवारी साधनहरु लिलाम नहुँदा दिन प्रतिदिन कवाड बनेका हुन् । भन्सारमा हाल १ सय ६६ वटा मोटरसाईकल, २ वटा अटो, १ ट्याक्टर, २ वटा कार र २ वटा पिकअप जीप रहेको भन्सार अधिकृत चुरा बहादुर सर्तुङ्खीले बताए । उनले यसवर्ष लिलामीको प्रकृया अगाडी बढाउने समेत बताए । भन्सारमा २ वर्ष अघिदेखि यी साधनहरु थन्केको प्रशासन शाखा प्रमुख बाबुराम बस्यालले बताए ।
यसवर्ष सुठौली भन्सार कार्यालयको राजश्व असुली दर समेत घट्दै गएको छ । गएको आर्थिक वर्ष २०७८/०७९ मा लक्ष्य भन्दा बढि राजश्व असुल गरेको कार्यालयले त्यसपछि भने लक्ष्य भन्दा कम राजश्व असुली भएको बताएको छ ।
सुठौली भन्सार कार्यालयको तथ्यांक अनुसार चालु आर्थिक वर्ष २०७९/८० को चैत्र महिना सम्म लक्ष्य भन्दा आधा मात्र राजश्व असुल भएको छ । आर्थिक वर्ष २०७८/७९ को चैत्र मसान्त सम्म ८१.१७ प्रतिशत राजश्व असुली गरेको थियो भने यस वर्ष २०७९/०८० को सोही अवधिमा ४८.०१ प्रतिशत मात्र राजश्व असुली गरेको छ । चैत्र महिनामा भन्सार कार्यालयले आर्थिक वर्ष २०७९/८० मा दुई अर्ब ७ करोड ९७ लाख ५८ हजार रुपैयाँ राजश्व असुल गर्ने लक्ष्य राखेको भएपनि ६७ करोड ६८ लाख ९२ हजार रुपैयाँ मात्रै असुल गरेको छ ।
सोही अवधिमा आर्थिक वर्ष २०७८/७९ मा १ अर्ब ४५ करोड ७३ लाख ४२ हजार रुपैयाँ राजश्व असुल गर्ने लक्ष्य राखिएकोमा १ अर्ब १८ करोड २८ लाख रुपैयाँ असुल गरेको थियो ।
गएको आर्थिक वर्षमा लक्ष्य भन्दा असुली बढि भएपछि भन्सार विभागले सुठौली भन्सार कार्यालयको वार्षिक राजश्व असुली गर्ने लक्ष्य बृद्धि गरी आर्थिक वर्षमा २०७९/८० मा सो रकम निर्धारण गरेको थियो ।
सुठौली भन्सार कार्यालयका अधिकृत सर्तुङ्खी आयात घटेको कारणले गर्दा राजश्व असुलीमा संकुचन आएको बताए । उनले गाडी, मोटरसाइकल जस्ता विलासितामा सामानहरु र महंगा सामानहरु यस नाकाबाट आयातमा रोक लगाइएकोले अनिवार्य सामानहरु मात्रै आयात भइरहेको बताए । बैंकहरुले व्यापारीलाई ऋण लगानी नगरेको कारणले पनि सामान आयात घटेको खड्काले बताए । उनले बढेको महंगी, डलरको भाउ बृद्धि, उपभोक्ताको क्रय शक्तिमा क्षयिकरण, बैंकहरुको ऋण लगानी कटौती, तरलता अभाव लगायतको कारणले आयात घट्न गई भन्सार राजश्व असुली पनि संकुचित हुँदै गएको बताए । उनले फलफुल, कोईला, खरानी, खाद्यान्न, तरकारी र केही अन्य सामानहरु मात्रै आयात भइरहेको बताए ।
सबैभन्दा बढि फिनिसिङ्ग सेरामिक्स, बेकरी सामानहरु, आलु, खुर्सानी, पापड, कागज, ब्लांकेट र गलैचा सुठौली भन्सार भएर भारतबाट भित्रिने गरेको छ ।
भन्सारमा चालु आर्थिक बर्षको कुनै पनि महिनामा लक्ष्य अनुसार राजस्व संकलन भएको छैन । चालु आर्थिक वर्षको साउनमा १४ करोड ७३ लाख लक्ष्य रहेपनि ४४ दशमल ५३ प्रतिशत अर्थात ६ करोड ५६ लाख मात्र राजस्व संकलन भएको थियो । भदौमा १७ करोड ४२ लाखको लक्ष्य रहेकोमा ३७ दशमलव ३३ प्रतिशत ६ करोड ५० मात्र राजश्व उठेको छ । असोजमा १७ करोड ५३ लाखको लक्ष्यमा २७ दशमलव ६१ अर्थात ४ करोड ८४ लाख उठेको छ ।
कार्तिकमा १६ करोड ६४ लाखको लक्ष्यमा ५५ दशमलव १९ प्रतिशत ९ करोड १८ लाख संकलन भएको छ । मंसिरमा १८ करोड ३७ लाखको लक्ष्य मध्ये ५१ दशमलव ३७ प्रतिशत ९ करोड ४३ लाख संकलन भएको छ । पुसमा १९ करोड १४ लाखको लक्ष्यमा ५६ दशमलव ६९ प्रतिशत १० करोड ८५ लाख उठेको छ । आयत, मुल्य अभिबृद्धि कर, अन्तशुल्क कृषि सुधार शुल्क अन्य शीर्षकमा राजस्व संकलन भएको हो ।
आर्थिक बर्ष २०७८/०७९ मा लक्ष्यको ७१ दशमलव १३ प्रतिशत मात्र राजस्व संकलन भएको थियो । सो बर्ष भन्सारमा १ अर्व ३८ करोड ८४ लाख १० हजार राजश्व संकलन भएको थियो । सो बर्ष भन्सारलाई १ अर्व ९५ करोड १९ लाख ४४ हजारको लक्ष्य दिइएको थियो । आर्थिक बर्ष २०७७/०७८ मा लक्ष्यकोे १ सय ९३ प्रतिशत राजश्व उठेको थियो । अनलाइन सिस्टम र भारतीय जिएसटी लगायतका कारणले पनि राजश्व संकलनमा असर परेको हो ।
