हरि आचार्य, कपिलवस्तु
ईलाका प्रहरी कार्यालय पिपराको ३ महिने लागु औषध नियन्त्रण अभियान अन्र्तगत बाणगंगा नगरपालिकामा पालिका स्तरिय बैठक तथा अन्तरक्रिया गरिएको छ । बाणगंगा नगरपालिकाको कार्यालयमा उक्त कार्यक्रम सम्पन्न गरिएको ईलाका प्रहरी कार्यालय पिपराका प्रमुख प्रहरी निरिक्षक लोकेन्द्र जिसीले जानकारी दिनुभएको छ । उक्त बैठकमा लागु औषध दुर्व्यसनी तथा ओसारपोसार नियन्त्रणको ३ महिने अभियान, विपद व्यबस्थापन (आगलागी व्यबस्थापन) तथा सडक व्यबस्थापन र व्यारीकेट सम्बन्धमा विभिन्न निर्णयहरु गरिएको छ ।
बैठकमा विभिन्न सरोकारवालाहरुसंग समन्वय र सहकार्य गरि लागु औषध दुर्व्यसनी तथा ओसारपोसारलाई न्युनिकरण गर्ने, गर्मीयाममा हुने आगलागी तथा बनडढेलो सम्बन्धि जोखिम कम गर्न र विपद न्युनिकरण गर्न उपलब्ध साधन स्रोतको उपयोग गरि ईलाका प्रहरी कार्यालय पिपराका लागि अग्निनियन्त्रणको स्रोत उपलब्ध गराउने निर्णय गरिएको छ ।
त्यस्तै जितपुर तौलिहवा जितपुर सडक दुर्घट्नाको जोखिमलाई मध्यनजर गर्दै सवारी जाँच तथा ट्राफिक जाँचलाई तिब्र बनाउने र नयाँ बर्ष २०८२ को अवसरमा आयोजना हुने कार्यक्रममा सुरक्षाको प्रबन्ध मिलाउने जस्ता महत्वपुर्ण निर्णय भएका छन् ।
कार्यक्रममा बाणगंगा नगरपालिकाका प्रमुख चक्रपाणि अर्यालले प्रहरीसंग समन्वय गरेर नगरपालिका अगाडि बढ्ने बताउनुभयो ।
ईलाका प्रहरी कार्यालयका प्रमुख प्रहरी निरिक्षक लोकेन्द्र जिसिले लागु औषध नियन्त्रण, विपद व्यबस्थापन (आगलागी व्यबस्थापन) तथा सडक व्यबस्थापनको कामलाई प्रहरीले प्राथमिकताका सााथ काम गरिरहेको बताउनुभयो ।
कार्यक्रममा नगरपालिकाका उप प्रमुख रीता कुमारी चौधरी, विभिन्न सामाजिक संस्था, क्लव, सामुदायिक वनका पदाधिकारी तथा प्रतिनिधिहरुको उपस्थिती रहेको कार्यक्रम प्रहरी सहायक हवल्दार ईश्वरी भट्राईको संचालनमा सम्पन्न भएको हो ।
