हरि आचार्य, कपिलवस्तु
होटल तथा पर्यटन व्यवसायी संघ कपिलवस्तुको आयोजनामा १० दिने ‘रैथाने खाद्य वस्तुबाट परिकार बनाउने कुक तालिम’ सुरु भएको छ । बाणगंगा नगरपालिका वडा नं. २ को आर्थिक सहयोग तथा संघको आयोजनाामा युवा व्यवसायका लागि रोजगार अन्तर्गत १० दिने ‘रैथाने खाद्य वस्तुबाट परिकार बनाउने कुक तालिम’ को आज उद्घाटन गरिएको हो ।
तालिमको उद्घाटन गर्दै बाणगंगा नगरपालिकाका महिला, वालवालिका तथा ज्येष्ठ नागरिक शाखा प्रमुख शुसीला पन्थले स्थानीय सरकारले नागरिकको सीप विकास गरि स्वरोजगार र रोजगारको अवसरहरुको सृजना गर्ने कार्य गरिरहेको बताउनुभयो । कार्यक्रमका प्रमुख अतिथि समेत रहनुभएका शाखा प्रमुख पन्थले तालिम तालिमका लागि मात्र नभई परिणाममुखी हुनुपर्ने बताउदै होटल तथा पर्यटन व्यवसायी संघ कपिलवस्तुले संचालन गरेका तालिम प्रभावकारी हुंदै आएको बताउनुभयो ।
होटल तथा पर्यटन व्यवसायी संघ कपिलवस्तुका अध्यक्ष रबिन्द्र पौडेलले यो तालिमले स्वदेश मात्र नभई वैदेशिक रोजगारीमा जानेलाई पनि आयआर्जनको माध्यम बनिरहेको बताउनुभयो । उहाँले संघले विभिन्न खालका तालिमहरुको संचालन गरि नागरिक उद्यमशिल, रोजगार तथा स्वरोजगार बनेको तथ्यांक समेत रहेको बताउनुभयो । सहभागीहरुलाई नबुझेको बिषय प्रशिक्षकलाई सोध्न अनुरोध गर्दै संघले अनुगमन गर्ने बताउनुभयो ।
त्यस्तै बाणगंगा नगरपालिका वडा नंं. २ का वडा सचिव नरेन्द्र पोख्रेल, बाणगंगा राईडर्स क्लवका अध्यक्ष बिष्णु प्रसाद सापकोटाले शुभकामना मन्तब्य दिंदै तालिम निकै समय सान्दर्भिक रहेको बताउँदै यसबाट युवाहरुलाई रोजगार र स्वरोजगारको अवसर सृजना हुने विश्वास व्यक्त गर्नुभयो ।
तालिमको प्रमुख प्रशिक्षकको रुक्मिणी पराजुली रहनुभएको छ । उहाँले १० दिन सम्म सहभागीहरुलाई सक्रिय रुपमा तालिममा सहभागी हुन आग्रह गर्नुभयो ।
संघका अध्यक्ष रबिन्द्र पौडेलको अध्यक्षता, बरिष्ठ उपाध्यक्ष झिमलाल सापकोटाको स्वागत मन्तब्यमा सम्पन्न उद्घाटन कार्यक्रममा संघका महासचिव रोमलाल पौडेल, सचिव महादेव न्यौपाने, कोषाध्यक्ष सरोज मणि पौडेल लगायतका पदाधिकारी, सदस्य तथा सहभागीहरुको उपस्थिती रहेको थियो ।
