लुदस, कपिलवस्तु
२५६९ औं बुद्ध जयन्तीको अवसरमा सञ्चारीका समुह कपिलवस्तुले बिरामीहरुलाई फलफुल बितरण गरेको छ । सोमबार बाणगंगा १ मा अवस्थित कपिलवस्तु सामुदायिक डायलासिस सेन्टरमा उक्त कार्यक्रम सम्पन्न भएको हो ।
कार्यक्रममा बोल्दै सञ्चारिका समुह नेपाल लुम्बिनी प्रदेश कोषाध्यक्ष सरिता थारुले बिरामी प्रति समर्पित सेवामा संलग्न हुन पाउँदा खुसी लागेको बताउनुभयो । उहाँले महिला पत्रकारहरू प्रायः अरूका हकहितमा कलम चलाइरहँदा आफ्नै समस्याहरू ओझेलमा परेको गुनासो गर्नुभयो ।
यस्तै कार्यक्रममा बोल्दै कपिलवस्तु सामुदायिक डायलासिस सेन्टरका म्यानेजर पुजा राना भाटले हाल डायलासिस सेन्टरमा ७१ जना नियमित बिरामी उपचाररत रहेको जानकारी दिनुभयो । उहाँले सञ्चारिका समूहले फलफूल वितरण गर्नु सकारात्मक पहल भएको भन्दै आगामी दिनहरूमा पनि यस्ता सहयोगमूलक कार्यक्रमहरूको अपेक्षा व्यक्त गर्नुभयो ।
कार्यक्रममा कपिलवस्तु जेसिज वर्ष २०२५ का अध्यक्ष जेसि जनक बेल्बासेले खुशी लागेको बताउँदै जिल्लामा महिला पत्रकारको संख्या घट्दै गएको प्रति चिन्ता व्यक्त गर्नुभयो ।
सञ्चारिका समूह कपिलवस्तुकी अध्यक्ष कोपिला पोख्रेलले संस्था सधैं महिला तथा पिछडिएका समुदायका मुद्दामा क्रियाशील रहँदै आएको बताउँदै यस पटक भने पृथक तरिकाले कार्यक्रम आयोजना गरेको बताउनुभयो । उहाँले डायलासिस गराउने बिरामीको स्वास्थ्यमा फलफूलले सकारात्मक प्रभाव पार्ने विश्वास व्यक्त गर्दै आगामी दिनमा अझ प्रभावकारी कार्यक्रम ल्याउने प्रतिबद्धता जनाउनुभयो ।
संस्थाका अध्यक्ष कोपिला पोख्रेलको अध्यक्षतामा भएको कार्यत्रलमको सञ्चालन सचिव भगवती न्यौपानेले गर्नुभएको थियो । कार्यक्रममा समुहका कार्यसमितिका पदाधिकारी तथा सदस्यहरुको उपस्थिती रहेको थियो ।
