२०६३ सालमा प्रदर्शित चलचित्र ‘घायल’मा एउटा गीत छ, ‘माया गर मायालुले’ । त्यतिबेला खासै चर्चामा नआएको गीत गत वर्ष एकाएक फेसबुक, युटुब, टिकटक, इन्स्टाग्रामलगायतका डिजिटल प्ल्याटफर्ममा भाइरल बन्यो ।
वि.सं. ६०को दशकमै प्रदर्शन भएको चलचित्र ‘वरपीपल’मा समाविष्ट ‘जनम जनम जिउला सँगै’ गीतले पनि गत वर्ष नै भाइरल भयो । यस्ता पुराना गीत थुप्रै छन्, जो विशेष घटना र प्रसंगको कारण पछिल्लो समय भाइरल भइरहेका छन् ।
सोही क्रममा अहिले एउटा गीतले युटुबमा भ्युजको बाढी ल्याएको छ । छ वर्षअघि प्रदर्शित ‘दाल भात तरकारी’ चलचित्रमा समाविष्ट ‘भिजिट भिसामा’ बोलको गीतले चार करोड भ्युज नघाएको छ । वरिष्ठ कलाकार हरिवंश आचार्यको शब्दमा अञ्जु पन्त र निशान भट्टराईले स्वर दिएको उक्त गीतमा अहिले भ्युजको उछाल आएको हो ।
यो गीत त्यतिबेला पनि हिट मध्येको एक थियो । एक महिना अघिसम्म गीतले सवा तीन करोड हारहारीमामा भ्युज पाएको थियो । तर आज मध्यान्हसम्म गीतको भ्युज चार करोड नौ लाख ७७ हजार पुगेको छ । पछिल्लो केही हप्तामै गीतले ७० लाखभन्दा बढी भ्युज पाएको हो ।
यसरी गीतले एकाएक भ्युज पाउनुको कारणमा गृहमन्त्री रमेश लेखक भिजिट भिसा प्रकरणमा मुछिनु मुख्य हो । यतिबेला विभिन्न मिम पेजहरुले उक्त गीतमा गृहमन्त्री लेखकको तस्बिर ग्राफिक्स गरेर भिडियो रिल बनाइरहेका छन् । टिकटक र फेसबुकको रिललाई अध्ययन गर्ने हो भने दुई हप्ताभित्र उक्त गीतमा झण्डै १७ हजारभन्दा बढी रिल बनेका छन् ।
