इन्डियन प्रिमियर लिग (आईपीएल) २०२५ मा रोयल च्यालेन्जर्स बैंग्लोर (आरसीबी) नयाँ च्याम्पियन बनेको छ।
आरसीबीले पञ्जाब किंग्सलाई ६ रनले पराजित गर्दै १८औं सिजनको उपाधि जितेको हो। आरसीबीले पहिलो पटक आईपीएलको उपाधि जिते पनि धेरैको अपेक्षा पञ्जाब किंग्सले ट्रफी जित्ने थियो, तर नतिजा उल्टियो।
उपाधि जितेपछि आरसीबीले २० करोड भारतीय रुपैयाँको पुरस्कार प्राप्त गर्यो, जबकि उपविजेता पञ्जाब किंग्सले १२.५ करोड भारुमा सन्तुष्ट हुनुपर्यो। तेस्रो स्थानमा रहेको मुम्बई इन्डियन्सले ७ करोड र चौथो स्थानमा रहेको गुजरात टाइटन्सले ६.५ करोड भारु प्राप्त गरे।
अरुण जेटली स्टेडियमले पिच र ग्राउन्ड अवार्डमार्फत ५० लाख भारु प्राप्त गर्यो। त्यस्तै, सूर्यकुमार यादव टुर्नामेन्टको उत्कृष्ट खेलाडी चुनिए र उनले १५ लाख भारु पुरस्कार पाए।
सिजनमा सर्वाधिक ७५९ रन बनाउने गुजरातका साई सुदर्शनले ओरेन्ज क्यापसहित १० लाख भारु जिते। सर्वाधिक २५ विकेट लिने प्रसिद्ध कृष्णले पर्पल क्यापसहित १० लाख भारु प्राप्त गरे। १४ वर्षीय वैभव सूर्यवंशी सिजनको सुपर स्ट्राइकर चुनिए।
गुजरातका ओपनर साई सुदर्शनले सर्वाधिक व्यक्तिगत अवार्ड जिते। ओरेन्ज क्यापबाहेक उनले अल्टिमेट फ्यान्टेसी प्लेयर अफ द सिजन, इमर्जिङ प्लेयर अफ द सिजन, र सर्वाधिक चौका (मोस्ट बाउन्ड्री) को अवार्ड पनि हात पारे।
मुम्बईका सूर्यकुमार यादवले सर्वाधिक चौका हान्दै मोस्ट भ्यालुएबल प्लेयरको अवार्ड जिते।
त्यस्तै, सर्वाधिक छक्का हान्ने निकोलस पुरन, उत्कृष्ट बलर (ग्रिन डट बाल) मोहम्मद सिराज, र सिजनको उत्कृष्ट क्याच लिने कमिंदु मेंडिसले पनि अवार्ड जिते।
यी सबैले १०–१० लाख भारु पुरस्कार प्राप्त गरेका छन्।
