हरि आचार्य, कपिलवस्तु
कपिलवस्तुको शुद्धोधन गाउँपालिका वडा नं. १ का वडाध्यक्ष र उहाँका दाई माथि कुटपिट भएको छ । वडा नं. १ का वडाध्यक्ष मोहम्मद ताहिर र उहाँका दाई राष्ट्रिय युवा संघ नेपालका नेता तैय्यव खाँ माथि केहि युवाहरुको समुहले बाटोमा हिडिरहेको बेला एक्कासी कुटपिट गरेको पिडित पक्षले जानकारी दिएको छ । पिडित पक्ष वडाध्यक्ष ताहिर र उहाँका दाई खाँले पिडक पक्षलाई कारवाहीको माग गर्दै जिल्ला प्रहरी कार्यालय कपिलवस्तुमा जाहेरी दिएका छन् ।
सुरुमा विजुवाको पुलमा भारतीय कारले ठक्कर दिई ज्यान मार्ने उद्देश्यले पुलबाट खसाल्ने प्रयास गरेको प्रत्यक्षदर्शी अकबर अलि मुसलमान, अब्दुल मोगिस मुसलवानले बताउनुभएको छ ।
त्यस पश्चात मायादेवी गाँउपालिका वडा नं २ भैसकुण्डा टोल बस्ने अन्दाजी ३० बर्षिय गुड्डु भन्ने अस्फाक मुसलमान, सोहि वडाको मनखोरिया टोल बस्ने अन्दाजी २८ बर्षको महबुब मुसलमान र सोहि वडा घर भै हाल मायादेवी गाँउपालिका वडा नं ८ बर्कुल टोलमा भाडामा बस्ने अन्दाजी ३८ बर्षको रफिक भन्ने मैनुद्धिन विरुद्ध प्रहरीमा जाहेरी दिईएको छ भने अन्य नचिनेका व्यक्तिहरु पनि कुटपिटमा संलग्न रहेको उहाँहरुका बुवा अब्दुल अजिज खाँले लुम्बिनी दर्पणलाई जानकारी दिनुभयो ।
जाहेरीमा आफुहरु मोटरसाइकलबाट धार्मिक समारोह (जल्सा) मा मायादेवी गाँउपालिका वडा नं ४ बुलकडिहवा जाने क्रममा मायादेवी गाँउपालिका वडा नं ८ पिपरा चाकर चौडा प्रहरी चौकी देखी उत्तर मस्जिद देखी दक्षिण रफिक भन्ने नैमुद्दिन भाडामा बसेको घरको अगाडी पकडी चाकर चौडा सार्वजनिक बाटोमा पुग्दा उनीहरुले भारतीय कारले आफुहरु सवार मोटरसाईकललाई जानी बुझी पछाडीबाट ज्यानै मार्ने उद्देश्यले ठोक्ने प्रयास गरे तर असफल भएपछि ओभरटेक गरी आफुहरुलाई मोटरसाईकलबाट उतारी लाठी डन्डा, ईट्टा, ढुंगाले कुटपिट गरी अभद्र व्यवहार गरेको उल्लेख गरिएको छ ।
उनीहरुले ईट्टा, लट्ठी लगायतका घरेलु हतियार प्रहार गरेको पिडित पक्षले बताएका छन् । कुटपिट भईरहदा जनप्रतिनिधिहरु र स्थानीय उपस्थित भई पिडित पक्षको उद्धार गरेको र कुटपिट गर्नेको समुह भने त्यहाँबाट भागेको बताईएको छ । दुवै जनाको टाउको, आँखा, निधार, खुट्टा, हात लगायतका अंगमा चोट लागेको छ ।
पिडित पक्षले केहि असहमति भए छलफल गरेर निष्कर्षमा पुग्न सकिने बताए पनि पिडक पक्षले वडाध्यक्षलाई तिमीहरु धेरै ठुलो मान्छे भयौं, तिमीहरुलाई नकुटी हुंदैन भन्दै आक्रमण गरि मरणासन्न कुटपिट गरेको वडाध्यक्ष मोहम्मद ताहिरले जानकारी दिनुभयो । यसरी जनप्रतिनिधि नै असुरक्षित हुँदा जनताको काम र विकास कसरी गर्ने, वडाध्यक्ष ताहिरले प्रश्न गर्नुभयो ।
यस बिषयमा पिडित पक्षले निवेदन तथा जाहेरी दिईसकेको र जाहेरी दर्ता गरि आवश्यक अनुसन्धानको प्रक्रिया अगाडि बढाईसकेको जिल्ला प्रहरी कार्यालय कपिलवस्तुका प्रहरी उपरिक्षक निरन्जन दत्त भट्टले लुम्बिनी र्दपण अनलाईनसंग बताउनुभयो । पिडक पक्षसंग सम्पर्क गर्न खोज्दा सम्पर्क हुन सकेन ।
बुवा अब्दुल अजिज खाँको भनाई अनुसार पिपरा चाकर चौडा सडकखण्डको पकडी देखि चाकरचौडा सम्मको बिचमा यस भन्दा अगाडि गाउँपालिका अध्यक्ष वलीउद्धिन मुुसलवानका छोरा फैजान खाँ, पुर्व अध्यक्ष वजरंगी चौधरी र प्रदेश सभाका उम्मेद्वार हाल माओवादीका केन्द्रिय नेता असरार अहमद भन्ने मोटे, नेपालका तर्फबाट पुर्व प्रस्तावित साउदीका राजदुत अबुसुफियान मुसलमान लगायत अन्यलाई सम्बन्धित क्षेत्रमा आफ्नो वर्चश्व कायम गर्नका लागि आतंकित समुहले बाटो छेकेर कुटपिट गरिसकेका छन् ।
