कपिलवस्तु,
कवि शिरोमणि लेखनाथ पौडेलको १४२औँ जन्मजयन्तीको अवसरमा बाणगङ्गा प्रज्ञा प्रतिष्ठानको आयोजना तथा बाणगङ्गा नगरपालिकाको सहयोगमा कविता लेखन तथा वाचन प्रतियोगिता सम्पन्न भएको छ। कार्यक्रम बाणगङ्गा नगरपालिकाको सभा हलमा आयोजना गरिएको हो।
प्रतिष्ठानका अध्यक्ष बालाराम ज्ञवालीको अध्यक्षतामा सम्पन्न कार्यक्रममा नगर प्रमुख चक्रमणी अर्याल प्रमुख अतिथि रहनुभएको थियो। यस्तै, उपप्रमुख रिता कुमारी चौधरी, प्रमुख प्रशासकीय अधिकृत भक्तिराम मरासिनी विशिष्ट अतिथिका रूपमा सहभागी हुनुहुन्थ्यो। कार्यक्रममा वडा नम्बर ९ का अध्यक्ष कमल पौडेल, बाणगङ्गा सामुदायिक पुस्तकालयका उपाध्यक्ष दोलखबहादुर पछाइ, बाणगङ्गा साहित्य प्रतिष्ठानका अध्यक्ष कृष्णप्रसाद घिमिरे, राधा पाण्डे, देवका भण्डारी, दधी स्मृति साहित्य समाजका कोषाध्यक्ष बाबुराम भण्डारी, प्रकाश भुसाल, राधिका आचार्य, साहित्यप्रेमी अध्यापक बुद्धिराज आचार्य, अशोक बेल्बासे, लालमणि अधिकारी, डिल्लीराम भट्टराई, लक्ष्मण आचार्य, कमला ज्ञवालीलगायतको उपस्थिति रहेको थियो।
‘नैतिकता र सदाचार’ शीर्षकमा सम्पन्न प्रतियोगितामा ११ जना प्रतियोगी सहभागी भएका थिए। प्रतियोगितामा बाणगङ्गा माध्यमिक विद्यालय लौगाईमा कक्षा ११ मा अध्ययनरत छात्रा जोशिका कँडेल (निशा) प्रथम, सगरमाथा बोर्डिङ स्कुलका आयुष अधिकारी दोस्रो तथा बाल ज्योति बोर्डिङ स्कुलकी रुही थापा तेस्रो हुन सफल भएका छन्। यस्तै, ज्ञानपुञ्ज बोर्डिङ स्कुलका शिखर अर्यालले सान्त्वना स्थान प्राप्त गरेका छन्। विजयी प्रतियोगीहरूलाई नगद पुरस्कार तथा प्रमाणपत्र प्रदान गरिएको थियो।
शैक्षिक व्यक्तित्व सूर्यप्रसाद भुसालको संयोजकत्वमा कृष्णप्रसाद घिमिरे र लेखनाथ घिमिरे सदस्य रहेको मूल्याङ्कन समितिले प्रतियोगिताको नतिजा सार्वजनिक गरेको हो।
कार्यक्रममा सहभागी सबै प्रतियोगीसँगै राधा पाण्डे, डिल्लीराम भट्टराई, लालमणि भट्टराई, लक्ष्मण आचार्य तथा कमला ज्ञवालीले शुभकामना मन्तव्यसहित आफ्ना रचनाहरू वाचन गर्नुभएको थियो।
शुभकामना मन्तव्यका क्रममा प्रमुख अतिथि नगर प्रमुख चक्रमणी अर्यालले यस्ता सृजनशील प्रतियोगिताले नगरभित्रका विद्यालयमा अध्ययनरत विद्यार्थीहरूको शैक्षिक जग बलियो बनाउने उल्लेख गर्दै नगरपालिकाले यस्ता कार्यक्रमलाई निरन्तरता दिने प्रतिबद्धता व्यक्त गर्नुभयो।
विशिष्ट अतिथि भक्तिराम मरासिनीले कवि शिरोमणि लेखनाथ पौडेलको साहित्यिक योगदानको स्मरण गर्दै जीवनमा गति, यति र लयको महत्वबारे शिक्षक तथा विद्यार्थीलाई अभ्यास गर्न आग्रह गर्नुभयो।
कार्यक्रममा प्रज्ञा प्रतिष्ठानका सल्लाहकार बुद्धि सागर बेल्बासेले आफ्नै गीति रचनासहित स्वागत मन्तव्य राख्नुभएको थियो। कार्यक्रमबारे जानकारी फोकल पर्सन बुद्धि सागर सुवेदीले दिनुभएको हो भने कार्यक्रम सञ्चालन प्रतिष्ठानकी सदस्य राधा पाण्डेले गर्नुभएको थियो।
