काठमाण्डौ – कांग्रेस केन्द्रीय कार्यसम्पादन समितिको हिजोको बैठकले वैशाख अन्तिम हप्ता महाधिवेशन गर्ने निर्णय गरेको छ । पार्टी कार्यालय सानेपामा बसेको बैठकमा कार्यवाहक सभापति पूर्णबहादुर खड्काले चुनावपछि महाधिवेशन गर्नेगरी प्रस्तुत कार्यतालिकासहितको प्रस्ताव बहुमतले पारित गरिएको हो ।
कार्यतालिकाअनुसार कांग्रेसको १५औं महाधिवेशन वैशाख २८ देखि ३१ सम्म काठमाण्डौमा हुनेछ । यही पुसमा प्रस्ताव गरेको १५औँ महाधिवेशन विभिन्न समस्याका कारण हुन नसकेकाले त्यो कार्यतालिका परिमार्जनसहित बहुमतले पारित गरिएको प्रवक्ता प्रकाशशरण महतले बताउनुभयो । उहाँका अनुसार बैठकले केन्द्रीय कार्यसमितिको म्याद आउँदो जेठ मसान्तसम्म थप्ने निर्णयसमेत गरेको छ । यसअघि मंसिर १५ को बैठकले माघ मसान्तसम्म केन्द्रीय कार्यसमितिको म्याद थप गरेको थियो ।
त्यस्तै तल्ला कमिटीका म्यादहरु पनि विधानको व्यवस्थाअनुसार थप हुने महतले बताउनुभयो । महामन्त्रीद्वय गगनकुमार थापा र विश्वप्रकाश शर्मासहितले बैठकको निर्णयमा असहमति जनाउँदै विशेष महाधिवेशन आह्वान गर्ने भन्दै तयारीमा बस्न १४औं महाधिवेशनका प्रतिनिधिहरुलाई आग्रह गर्नुभएको छ । नियमित महाधिवेशनको कार्यतालिकामा दुई महामन्त्रीसहित पाँच जनाले ‘नोट अफ डिसेन्ट’ लेखेका छन् ।
नोट अफ डिसेन्ट लेख्नेमा महामन्त्रीद्वय गगन थापा र विश्वप्रकाश शर्मासहित सहमहामन्त्री फरमुल्ला मन्सुर तथा केन्द्रीय सदस्य अर्जुननरसिंह केसी र उमा रेग्मी छन् । कांग्रेस महामन्त्री थापाले विधान अनुसार अब पुस मसान्तभित्र विशेष महाधिवेशन हुने बताउनुभयो । त्यो विशेष महाधिवेशन केन्द्रीय कार्यसमितिले निर्णय गरेर हुन्छ कि केन्द्रले आह्वान गरेर हुन्छ, त्यो चाहिँ केही दिनमा टुंगो लाग्ने उहाँको भनाइ छ ।
केन्द्रीय कार्यसम्पादन समिति बैठकले पुसभित्र आवधिक महाधिवेशन नगरी नयाँ कार्यतालिका पारित गरेकाले अब विधान अनुसार विशेष महाधिवेशन हुने महामन्त्री थापाले बताउनुभयो । पुसभित्र नियमित महाधिवेशन हुन नसकेको अवस्थामा विशेष महाधिवेशन बोलाउन बाध्यकारी भएकाले हिजोको केन्द्रीय कार्यसमिति बैठकमा आफूले फरक मत राखेको उहाँको भनाइ छ ।
