महाशिवरात्रिको पावन अवसरमा श्री लक्ष्मणघाट बोलबम धाममा दर्शनार्थी भक्तजनहरूको उल्लेखनीय भीड देखिएको छ। विहानैदेखि धाम परिसरमा भक्तजनहरूको ओइरो लाग्न थालेको र दिनभर दर्शन–पूजामा सहभागी हुनेहरूको संख्या निरन्तर बढिरहेको धाम व्यवस्थापन समितिले जनाएको छ।
धामका अध्यक्ष रणबहादुर काउचाका अनुसार शिवरात्रीलाई लक्षित गर्दै विशेष पूजा, आरती तथा भजन–कीर्तन कार्यक्रम आयोजना गरिएको छ। “विहानैदेखि भक्तजनहरूको अत्यधिक भीड रहेको छ। दर्शनलाई सहज बनाउन स्वयंसेवक परिचालन, सुरक्षा व्यवस्था र लाइन व्यवस्थापनलाई व्यवस्थित गरिएको छ,” अध्यक्ष काउचाले जानकारी दिनुभयो।
श्रद्धालु भक्तजनहरूले भगवान शिवको पूजा–आराधना गर्दै परिवारको सुख, शान्ति र समृद्धिको कामना गरेका छन्। धाम परिसरमा प्रसाद वितरण व्यवस्था समेत मिलाइएको छ।
कार्यक्रम शान्तिपूर्ण रूपमा सञ्चालन भइरहेको छ। शिवरात्रीको अवसरमा धाम क्षेत्रमा धार्मिक तथा सांस्कृतिक माहोल झनै उल्लासमय बनेको छ।
