लुदस, कपिलबस्तु । कपिलवस्तु जिल्लाका विभिन्न स्थानमा विष्फोटक पदार्थ राखेको आरोपमा एक जना व्यक्ति पक्राउ परेका छन् । जिल्ला प्रहरी कार्यालय कपिलवस्तुले जिल्लाका तीन स्थानमा शंकास्पद विष्फोटक पदार्थ फेला परेपछि अनुसन्धान गर्दै एक जनालाई नियन्त्रणमा लिएको जनाएको छ ।
जिल्ला प्रहरी कार्यालयका अनुसार मंगलबार बुद्धभूमि नगरपालिका वडा नं। २ अन्तर्गत गोरुसिङ्गे जंगलस्थित पूर्व–पश्चिम राजमार्ग सडकखण्ड, महाराजगञ्ज नगरपालिका वडा नं। २ को वाणगंगा नदीको बगदी पुल नजिक तथा शिवराज नगरपालिका वडा नं। १ अन्तर्गत शिवपुर रेंजर पोष्ट नजिक बमजस्तो देखिने शंकास्पद वस्तु फेला परेको थियो ।
विशेष सूचनाका आधारमा प्रहरीले उक्त स्थानहरूमा सार्वजनिक प्रयोग हुने सडक, बाटो, पुल तथा सर्वसाधारणको आवतजावत हुने स्थानमा विष्फोटक पदार्थ राखिएको आशंकामा खोजतलास तथा अनुसन्धान अघि बढाएको थियो ।
अनुसन्धानका क्रममा वाणगंगा नगरपालिका वडा नं। २ तिनैया निवासी नेपाल कम्युनिष्ट पार्टी (बहुमत) का साधारण सदस्य वर्ष ४५ का शोभे थारु भन्ने खोमे थारु लाई पक्राउ गरिएको प्रहरीले जनाएको छ ।
प्रहरीका अनुसार पक्राउ परेका थारुलाई इलाका प्रहरी कार्यालय गोरुसिङ्गे तथा इलाका प्रहरी कार्यालय पिपराको संयुक्त टोलीले नियन्त्रणमा लिएको हो ।
पक्राउ परेका थारुमाथि मुलुकी अपराध संहिता २०७४ को परिच्छेद ७ बमोजिम विष्फोटक पदार्थ सम्बन्धी कसुर शीर्षकमा मुद्दा दर्ता गरी कपिलवस्तु जिल्ला अदालतबाट ७ दिनको म्याद थप गरी अनुसन्धान अघि बढाइएको जिल्ला प्रहरी कार्यालयले जानकारी दिएको छ ।
यस घटनासम्बन्धी थप अनुसन्धान जारी रहेको प्रहरीले जनाएको छ ।
