जितपुर । वाणगंगा नगरपालिका–९, भर्तापुरमा सञ्चालन गरिएको एकीकृत घुम्ती शिविरबाट ९०४ जना स्थानीय नागरिकले विभिन्न सरकारी सेवा प्राप्त गरेका छन्। नागरिकलाई नगरपालिका कार्यालयसम्म पुग्नुपर्ने झन्झट हटाई घरदैलोमै सहज, छिटो र प्रभावकारी सेवा उपलब्ध गराउने उद्देश्यले शिविर आयोजना गरिएको हो ।
शिविरमा नगरपालिकाका विभिन्न शाखामार्फत सेवा प्रवाह गरिएको थियो। ज्येष्ठ नागरिक परिचयपत्र नवीकरण सेवाबाट २२ जना लाभान्वित भएका छन् भने व्यवसाय दर्ता तथा नवीकरण सेवा २ जनाले र दर्तासम्बन्धी परामर्श सेवा १० जनाले लिएका छन्।
स्वास्थ्य शाखामार्फत १३७ जनाले स्वास्थ्य परीक्षण तथा उपचार सेवा प्राप्त गरेका छन् भने आयुर्वेद शाखाबाट २५४ जनाले सेवा लिएका छन्। कृषि विकास शाखाले २५२ जना कृषकलाई विभिन्न बिउबिजन वितरण गरेको छ भने पशु विकास शाखाले १३६ जना किसानलाई पशु औषधि उपलब्ध गराएको छ। सुरक्षित आप्रवासन शाखाबाट ९२ जनाले वैदेशिक रोजगारीसम्बन्धी परामर्श तथा आवश्यक जानकारी प्राप्त गरेका छन्। यसरी विभिन्न शाखाबाट गरी कुल ९०४ जनाले सेवा लिएको जानकारी वाणगंगा नगरपालिका राजस्व शाखा प्रमुख मदन घिमिरेले दिएका छन्।
शिविरको उद्घाटन गर्दै नगर प्रमुख चक्रपाणि अर्यालले आफू निर्वाचित भएयता नगरको पहुँचबाट टाढा रहेका वडाका नागरिकलाई लक्षित गरी प्रत्येक वर्ष एकीकृत घुम्ती शिविर सञ्चालन गर्दै आएको बताए। उनले स्थानीय सरकारको मूल दायित्व नागरिकलाई सहज, गुणस्तरीय र घरदैलोमै सेवा उपलब्ध गराउनु रहेको उल्लेख गरे।
प्रमुख प्रशासकीय अधिकृत भक्तिराम मरासिनीले शिविरको अनुगमन गर्दै सेवाप्रवाहलाई अझ प्रभावकारी, पारदर्शी र नागरिकमैत्री बनाउन कर्मचारीलाई निर्देशन दिएका थिए।
वडा नं. ९ का अध्यक्ष कमल पौडेलले शिविरमा स्थानीयवासीको उत्साहजनक सहभागिताले यस्ता कार्यक्रमको आवश्यकता र प्रभावकारिता पुष्टि गरेको बताए। उनले आगामी दिनमा पनि नागरिकको आवश्यकताअनुसार यस्ता घुम्ती सेवा कार्यक्रमलाई निरन्तरता दिइने जानकारी दिए।
