जितपुर । बाणगङ्गा नगरपालिकाले रसुवा जिल्लाको भोटेकोशी नदीमा आएको विनाशकारी बाढीबाट प्रभावित नागरिकको राहत तथा पुनर्स्थापनाका लागि ४५ लाख रुपैयाँ सहयोग गर्ने निर्णय गरेको छ।
नगरपालिकाले २०८३ भदौ १० गते भोटेकोशी नदीमा आएको बाढीबाट भएको मानवीय तथा भौतिक क्षतिप्रति गहिरो दुःख व्यक्त गर्दै विपद्मा परी ज्यान गुमाउनेप्रति श्रद्धाञ्जली तथा शोकसन्तप्त परिवारजनमा समवेदना व्यक्त गरेको छ। साथै, घाइते तथा प्रभावित नागरिकको शीघ्र स्वास्थ्य लाभको कामना गरेको छ।
राष्ट्रिय विपद्को यस कठिन घडीमा बाढी प्रभावित नागरिकलाई राहत तथा पुनर्स्थापनामा सहयोग पुर्याउने उद्देश्यले २०८३/०५/१६ गते बसेको नगर कार्यपालिका बैठकको निर्णयअनुसार जनप्रतिनिधि, कर्मचारी, शिक्षक तथा नगरपालिकाको विपद् व्यवस्थापन कोषबाट एकमुष्ट रु. ४५,००,००० (पैंतालीस लाख) प्रधानमन्त्री दैवी प्रकोप उद्धार कोषमा आर्थिक सहयोग उपलब्ध गराउने निर्णय गरिएको नगरपालिकाले जनाएको छ।
नगर प्रमुख चक्रपाणी अर्यालद्वारा जारी विज्ञप्तिमा विपद्को समयमा प्रभावित नागरिकको सहयोगका लागि नगरपालिकाले आफ्नो तर्फबाट सहयोगको हात अघि बढाएको उल्लेख गरिएको छ।
