३० जेठ, बुटवल ।
लुम्बिनी प्रदेशका मुख्यमन्त्री शंकर पोखरेलले प्रदेशसभाको बहुमत सदस्यको समर्थन आफू नेतृत्वको सरकारलाई रहेको दाबी गरेका छन् ।
विपक्षी दलहरुले मुख्यमन्त्रीले बहुमत गुमाएको भनी सिद्ध गर्न चुनौती दिइरहेका बेला आइतबार प्रदेशसभा बैठकमा बोल्दै उनले सरकारको पक्षमा नेकपा एमालेका ३९ जना र जनता समाजवादीका ६ जना गरी ४५ जना सांसदको समर्थन रहेको दाबी गरे ।
‘कतिपय माननीयहरुले सरकारलाई बहुमत छैन भन्नुभएको छ, यो सरकारका पक्षमा ४५ जना सांसद हुनुहुन्छ,’ मुख्यमन्त्रीले भने, ‘विमलाजीको दल परिवर्तन गर्न मिल्दैन । जनता समाजवादीका ४ जना सरकारमै हुनुहुन्छ । राजनीतिक बहुमत यही हो ।’
तत्कालीन नेपाल कम्युनिष्ट पार्टीबाट उपनिर्वाचन जितेकी विमला खत्री वलीले वैशाख १८ गते नै माओवादी केन्द्र रोजेकी थिइन् । तर मुख्यमन्त्री पोखरेलले उनलाई एमाले सांसदकै रुपमा गणना गरेका छन् । ८३ सदस्यीय लुम्बिनी प्रदेशसभामा बहुमतका लागि ४२ सांसदको समर्थन आवश्यक पर्छ ।
सभामुख संविधानको संरक्षणकारी भूमिकामा हुनुपर्ने भन्दै मुख्यमन्त्री पोखरेलले जनता समाजवादी पार्टीका बारेमा प्रदेशसभा नै स्पष्ट नरहेको बताए । लुम्बिनी प्रदेशसभामा जनता समाजवादी पार्टीका ६ जना सांसद छन् । जसमध्ये महन्थ ठाकुर–राजेन्द्र महतो पक्षका ४ जना हाल प्रदेश सरकारमा नै रहेका छन् । जसपाको उपेन्द्र यादव पक्ष भने विपक्षी गठबन्धनको साथमा छ ।
मुख्यमन्त्री पोखरेलले जनता समाजवादी पार्टी संसदीय दलमा बहुमतले निर्णय हुन दिनुपर्ने बताए ।यसैबिच प्रदेश सरकारले प्रस्तुत गरेको आर्थिक वर्ष २०७८र७९ को नीति तथा कार्यक्रम बहुमतले पारित भएको छ ।
जेठ २५ गते प्रदेश प्रमुख धर्मनाथ यादवले नीति तथा कार्यक्रम पेश गर्दा विपक्षी सांसदहरुले बहिष्कार गरे पनि छलफलमा भाग लिएका थिए । छलफलका क्रममा विपक्षी दलका सांसदहरुले सरकारको वैधानिकतामाथि नै प्रश्न उठाउँदै नीति तथा कार्यक्रमको आलोचना गरेका थिए ।
आइतबार मुख्यमन्त्री पोखरेलले संसदमा उठेका प्रश्नहरुको जवाफ दिएपछि निर्णयार्थ प्रेश हुँदा बहुमतले नीति तथा कार्यक्रम पारित भएको छ । विपक्षी दलका सांसदहरुले नीति तथा कार्यक्रम पारित होस् भन्ने मुख्यमन्त्रीको प्रस्तावको विपक्षमा मत जाहेर गरेका थिए ।
