असार २०
नेकपा एमालेका उपाध्यक्ष वामदेव गौतमले पार्टी एकता जोगाउन आफू प्रधानमन्त्री एवं अध्यक्ष केपी शर्मा ओलीतिर लागेको बताएका छन् । संघीय संसद भवन नयाँ बानेश्वरमा पत्रकारहरूसँग कुराकानी गर्दै उपाध्यक्ष गौतमले पार्टी एकतामा देखिएको बाधा हटाउन आफूले प्रयास गरिरहेको बताएका छन् । मैले एकताको प्रस्ताव अस्ति केन्द्रीय कमिटीको बैठकमा राखेँ । बैठकले नै मलाई एकताको प्रयत्न गर्न जिम्मेवारी दिएको छ’, गौतमले भने । उनले अहिले अध्यक्ष ओली र वरिष्ठ नेता माधवकुमार नेपाल एक–आपसमा रिसाएको अवस्था रहेको भन्दै रिस शान्त नभएसम्म एकता जटिल रहेको बताए । ‘ म यी दुईटैको रिसलाई कसरी शिथिल बनाउन सकिन्छ भन्नेतिर लागिरहेको छु’, गौतमको भनाइ छ । सर्वोच्च अदालतले प्रतिनिधिसभा विघटनको मुद्दामा फैसला दिएपछि पार्टी एकतामा सहजता हुने गौतमको भनाइ थियो ।