काठमाडौं ,असार, २२

नेकपा एमालेको विवाद समाधानका लागि गठित कार्यदलको बैठक आज पनि निश्कर्ष विहीन भएरै टुंगिएको छ । आज बसेको बैठकमा पनि एकताका सम्बन्धमा कुनै सहमति निस्कन नसकेपछि भोली बिहान ८ बजे फेरि बैठक बस्ने गरि टुँगिएको हो ।सिंहदरबारस्थित प्रधानमन्त्री तथा मन्त्रिपरिषद कार्यालयमा बसेको बैठकमा असहमतिका विषयमा खुला छलफल भए पनि सहमति नभएको कार्यदलका एक सदस्यले बताए ।

गत जेठ २ गते अध्यक्ष केपी शर्मा ओली र वरिष्ठ नेता माधव कुमार नेपालबीच भएको सहमति अनुसार १० सदस्यीय कार्यदल बनेको थियो । यहीँ बीचमा नेताहरूमाथि कारवाही प्रकृया सुरु भएपछि कार्यदल निश्कृय भएको थियो । तर गत आइतबार अध्यक्ष ओली र नेता भीम रावलबीचको भेटवार्तापछि कार्यदल व्युँत्याउने र कार्यदलमार्फत नै विवादको समाधान खोज्ने सहमतिपछि सोमबारबाट कार्यदल सक्रिय बनेको हो ।
आजको बैठकमा पनि अनौपचारीक बैठकमा उठेका बिषयहरुमा छलफल भएको र विवादका बिषयमा कार्यदलका सदस्यहरुले खुलेर धारणा राख्ने काम भएको ती सदस्यले जानकारी दिए ।अब अर्को बैठक बुधबार विहान साढे ८ बजे फेरि बस्ने गरी आजको बैठक सकिएको छ ।