लुदस , काठमाडौँ ,साउन ५
नेकपा एमालेका एमालेका वरिष्ठ नेता माधवकुमार नेपाल सरकारमा सहभागी हुने सम्भावना देखिएको छ । तर, एमालेमा पछिल्लो समय चलिरहेको एकता प्रयासले कुन मोड लिन्छ भन्ने हेरेर मात्र आफू अगाडि बढ्ने नेपालले बताएका छन् ।केही दिन यता नेपाल पक्षधर सांसदमा पनि मतभेद देखिन सुरु गरिसकेको छ । प्रधानमन्त्रीमा शेरबहादुर देउवालाई विश्वासको मत दिने या नदिने भन्ने विषयमा यो गुटमा नेताहरुबीच भएको सामान्य मतभेद अब सरकारमा सहभागी हुने या नहुने भन्ने विषयमा पनि देखिन थालेको छ ।
ओलीसँग लडेर बस्नुभन्दा अलग पार्टी बनाउने र सरकारमा सहभागी हुने मुडमा नेपाल हुनुहुन्छ,’ उनीनिकट एक नेताले भने, ‘अस्ति सांसदमा देउवालाई विश्वासको मत दिएका र ओलीनिकट भनेर चिनिएका सांसदहरुले पनि हामी सहयोग गर्छौँ, सरकारमा जानुहोस् भन्ने सन्देश नेपाललाई पठाउनु भएको छ । यस्तो भएको खण्डमा उहाँ सरकारमा जानुहुन्छ ।’
आजै नेपालले प्रचण्डसँगको छलफलपछि आफ्नो समूहको भेला बोलाएका छन् । अर्कोतिर आजै नेकपा एमालेको केन्द्रीय कमिटी बैठक बस्दै छ । यो बैठकले नेपाललगायत देउवालाई विश्वासको मत दिएका नेताहरुलाई कारवाही गर्ने सम्भावना छ ।
नेपाल सरकारमा सहभागी भएको खण्डमा उनलाई ४ मन्त्रलाय दिन आफू तयार रहेको यसअघि नै देउवाले उनलाई बताइसकेका छन् । २९ असारमा प्रधानमन्त्रीमा नियुक्त भएपछि भोलिपल्ट नेपाल भेट्न नेपालनिवास कोटेश्वर पुगेका प्रधानमन्त्री शेरबहादुर देउवाले आफूलाई विश्वासको मत दिन र सरकारमा आउन नेपाललाई अनुरोध गरेका थिए ।
सर्वोच्च अदालतले त्यसभन्दा अघिल्लो दिन संसद पुनस्र्थापना तथा देउवालाई प्रधानमन्त्रीमा नियुक्त गर्न परमादेश दिएलगत्तै कोटेश्वरमा नै पाँच दलीय गठबन्धनको बैठक बसेको थियो । त्यो बैठकमा आफू अब गठबन्धनमा नरहने नेपालले बताएका थिए । तर, बालुवाटारबाट बालकोट पुगेपछि एमाले अध्यक्ष केपी शर्मा ओलीले अब एमालेमा नेपाललाई कुनै ठाउँ नभएको र उनी गद्दार भएको अभिव्यक्ति दिएका थिए ।त्यसपछि एमालेमा ओली र नेपालबीचको दूरी थप बढेको छ । नेपालले देउवालाई विश्वासको मत दिएपछि ओलीले फेरि नेपालले गद्दारी गरेको दोहोर्याएका छन् ।
एमालेमा देखिएका यी घटनाक्रमका कारण अब आफू फेरि ओलीसँग मिल्न नजाने अनुमान नेपालले गरिसकेका छन् । ‘त्यही भएर पनि उनले सरकारमा सहभागी हुने मुड बनाउनु भएको हुनसक्छ,’ उनी निकट एक नेताले भने, ‘यसबारे आजको छलफलपछि थप कुराहरु आउला ।’आज विहान कोटेश्वरमा आफ्नै निवासमा उनले माओवादी केन्द्रका अध्यक्ष पुष्पकमल दाहाल प्रचण्ड र जसपा अध्यक्ष उपेन्द्र यादवसँग छुट्टाछुट्टै भेट गरेका थिए । यो भेटमा प्रचण्ड र यादव दुवैले नेपाललाई सरकारमा सहभागी भएरै अगाडि बढ्न सुझाव दिएका थिए ।
विश्वासको मत दिएका सांसदहरुले अब पार्टी एक हुन नसक्ने अवस्थामा पुगिसकेको भन्दै नेपाललाई सरकारमा सहभागी हुन सुझाएका छन् । यही विषयमा आज विहान प्रचण्डसँग पनि नेपालको छलफल भएको स्रोतको दाबी छ ।
