काठमाडौं , आश्विन १९

आज प्रतिनिधिसभाको बैठकलाई नेकपा एमालेले पुनः नारावाजी गर्दै अवरोध गरेको छ ।सभामुख अग्निप्रसाद सापकोटाले बैठक सुरु भएको घोषणा गर्नासाथ प्रमुख प्रतिपक्षी दल एमालेका सांसदहरुले रोष्टम घेराउ गर्दै नारावाजी गरेका हुन ।

एमाले सांसदको नारावाजीकै बीच सभामुख सापकोटाले बैठकको नियमित प्रक्रियामा प्रवेश गरेर आफ्ना कुरा राख्न आग्रह गर्दै बैठक संचालनमा सहयोग गर्न आग्रह गरेका छन् । उनले संसदलाई नियमित अवरोध गर्दा संसदप्रति नै जनतामा वितिष्ण बढन् सक्नेमा पनि एमाले सांसदहरुलाई सचेत गराए ।

एमालेको अवरोधकै बीच सभामुख सापकोटाले प्रधानमन्त्री शेरबहादुर देउवाको तर्फबाट कानुनमन्त्री ज्ञानेन्द्रबहादुर कार्कीलाई राष्ट्रिय दलित आयोगको प्रतिवेदन २०७७÷७८ प्रस्तुत गर्न समय दिएका छन्। नारावाजीकै बीच मन्त्री कार्कीले प्रतिवेदन पेश गरेका छन्।गत भदौ २३ गतेदेखि सुरु भएको बैठकमा एमालेले सुरुदेखि नै निरन्तर अवरोध गर्दै आएको छ ।