रुपन्देहीको विकासको लागी सार्थक प्रयत्न गर्ने गृहमन्त्री खाँण प्रतिबद्धता

[sharethis-inline-buttons]

भैरहवा, कार्तिक १

गृहमन्त्री बालकृष्ण खाँणले रुपन्देहीको समृद्धिको लागी सदैव प्रयत्नशिल रहने प्रतिवद्धता जनाएका छन् ।गृहमन्त्री भए पछि पहिलो पटक गृह जिल्ला आएका खाँणले भैरहवामा आयोजित कार्यक्रममा बोल्दै रुपन्देहीको विकासले देशकै विकासको आधारशिला तयार गर्ने भएकोले रुपन्देहीको विकासको लागी सार्थक प्रयत्न गर्ने उनले जनाएका हुन् ।

रुपन्देहीमा रहेको गौतम बुद्ध अन्र्तराष्ट्रिय बिमानस्थल र एकिकृत भन्सार चौकीको बिकासको कार्ययोजना तयार पारेको उनले कार्यक्रममा बताए । उनले बेलहियामा मालवाहक गाडीहरुको पार्किङको समस्यालाई समाधान गर्न अहिले आईसीपीको लागी खाली रहेका जग्गामा पार्किङ्गको ब्यवस्था मिलाउन तयारी गरिएको पनि जानकारी दिए ।
यस्तै उनले बिमानस्थल छिटो भन्दा छिटो सन्चालनमा ल्याउन सार्थक प्रयास गरि रहेको जनाए । गल्छी–चितवनमा सुरुङ मार्गको बिषयमा पनि सरकारले प्रयत्न गरि रहेको उनले जनाए । यो रुट तयार भएपछि काठमाण्डौं र बिशेष गरि पश्चिमी तराई क्षेत्र जोडिने उनले बताए ।

फरक प्रसंङ्गमा बोल्दै खाँणले अहिले कांग्रेस बिभिन्न गठबन्धन संग मिलेर सरकारमा जानु परेको दाबी गरे । कांग्रेसले नचाहिदा नचाहदैे निकास दिन सरकारमा गएको उनले बताए । पार्टीलाई जोगउदै गठबन्धनलाई सम्मान गर्नु पर्ने उनको भनाई थियो ।

नेपाली कांग्रेसका नेता प्रेम नारायण खरेलको शोक सभामा भाग लिन रुपन्देही आएका गृहमन्त्री खाँणले शोक सभा पछि बुटवलको ज्योतीनगरमा गएको पहिरोको निरिक्षण गरि समुचित ब्यवस्था गर्न, यहाका सुरक्षा निकायका प्रमुखहरुसित बैठक गर्ने लगायतको कार्यक्रम रहेको जनाए ।

नेपाली कांग्रेसका जिल्ला सभापति अब्दुल रज्जाकको अध्यक्षतामा सम्पन्न कार्यक्रममा लुम्बिनी प्रदेशका शिक्षा, बिज्ञान, युवा तथा खेलकुद मन्त्री वसिउद्दिन खाँन, नेपाली कांग्रेसका पूर्व जिल्ला सभापति रामचन्द्र ढकाल लगाएतले कार्यक्रममा बोलेका थिए । उपसभापति सरीता चौधरीको स्वागत मन्तव्य ,जिल्ला सचिव रामकृष्ण खाँणको सञ्चालनमा कार्यक्रम सम्पन्न भएको थियो ।


प्रकाशित : २०७८ कार्तिक १, सोमबार १७:३४