बुटवल, कार्तिक २९
नेकपा एमालेको १० औं महाधिवेशनमा रुपन्देहीबाट सहभागी हुने ५ वटै निर्वाचन क्षेत्रबाट प्रतिनिधिहरुको टुङ्गो लागेको छ । आगामी मंसिर १० गते चितवनमा हुने महाधिवेशनका लागि रुपन्देही क्षेत्र नम्बर २ बाहेकका क्षेत्रहरुमा निर्वाचन प्रक्रियाबाट प्रतिनिधिहरुको टुङ्गो लगाइएको एमालेले जानकारी दिएको छ ।
रुपन्देही क्षेत्र नम्बर १ बाट जक यज्ञ गैरे, ध्रुव खरेल, कृष्ण न्यौपाने, ऋषिराम सापकोटा, विद्यालक्ष्मी गुरुङ र जागेश्वरी चौधरी निर्वाचित भएका छन् । आवश्यक प्रतिनिधि संख्याभन्दा झण्डै पाँच गुणा बढीले मनोनयन दर्ता गरेको क्षेत्र नम्बर २ मा भने सर्वसम्मत चयन गरिएको छ । उम्मेदवारी दिएकाहरूले सहमति पत्रमा हस्ताक्षर गरेपछि सर्वसहमति रूपमै प्रतिनिधि चयन गरिएको एमालेले जनाएको छ ।
खुल्लातर्फ पार्टी जिल्ला अध्यक्ष एवं बुटवलका मेयर शिवराज सुवेदी, प्रदेश सभा सदस्य भोजप्रसाद श्रेष्ठ, नगर प्रमुखहरु बासुदेव घिमिरे र चित्रबहादुर कार्की, प्रचार विभाग प्रमुख मोहन चापागाई, बावुराम भट्टराई, गोपाल राना र बलबहादुर आचार्य प्रतिनिधि भएका छन् । त्यस्तै महिलातर्फ गोमादेवी आचार्य, सावित्रा अर्याल र ज्ञानु केसी छनोट भएको एमाले जिल्ला अध्यक्ष सुवेदीले बताए ।
रुपन्देही क्षेत्र नम्बर ३ बाट महाधिवेशन प्रतिनिधिका लागि ६ जनाले प्रतिनिधित्व गर्ने भएका छन् । खुलातर्फ प्रदेश कमिटी सदस्य बिश्वराज बराल, जिल्ला कमिटी सदस्य हितराज पन्थी, प्रदेश सांसद तुलसीप्रसाद चौधरी र बुटवल उपमहानगरका प्रवक्ता रामप्रसाद रेग्मी रहेका छन् । महिलातर्फ ममता पौडेल र जिल्ला कमिटि सदस्य उमा अधिकारी निर्वाचित भएकी छन् ।
यसैगरी रुपन्देही क्षेत्र नम्बर ४ बाट बाबुलाल यादव, साधुशरण साहनी र कमला भण्डारी छनोट भएका छन् । क्षेत्र नम्बर ५ बाट रामचन्द्र यादव, जिवनाथ पाण्डे, शिव पौडेल, भूमिलाल सापकोटा र कल्पना हरिजन छनोट भएका छन् ।
जिल्लाबाट दलित खुल्ला तर्फ जोगलाल बिश्वकर्मा र सुरेन्द्र श्री तथा दलित महिला तर्फ कमला बि।क। प्रतिनिधि छनोट भएका छन् ।
यसैगरी मजदुर फाँट लुम्बिनी प्रदेश रुपन्देहीबाट कमल गौतम, हुमाकान्त काफ्ले, हरि कार्की र रञ्जु भट्टराई रहेका छन् ।
