हरि आचार्य, कपिलवस्तु
विकासका दृष्टिले बाणगंगामै पछाडी परेको वडा नं. १० लाई समृद्ध वडाको खाका तयार पार्ने लक्ष्यका साथ वडाध्यक्ष पदका उम्मेद्वार यम प्रसाद पोख्रेल चुनावी मैदानमा उत्रिनु भएको छ । विगतका जनप्रतिनिधिहरुले वडाको विकासमा चासो नदेखाएका कारण आफुले उम्मेद्वारी दिएको उहाँले बताउनुभएको छ । नेकपा एमालेको तर्फबाट बाणगंगा नगरपालिका वडा नं.१० का वडाध्यक्ष पदका उम्मेद्वार पोख्रेलले विकासका दृष्टिले पछाडी परेको वडालाई भौतिकसंगै सामाजिक रुपान्तरणमा अगाडि लैजाने दृढताका साथ उम्मेद्वारी दिएको बताउनुभयो ।
विद्यार्थीबाटै राजनीतिमा लाग्नुभएका पोख्रेल पार्टीका विभिन्न संगठनमा रही आफ्नो जिम्मेवारी कुशलतापुर्वक पुरा गर्दै पाका समाजसेवीको रुपमा परिचित हुनुहुन्छ भने टोल, वडा, ईलाका हुंदै अहिले पार्टीको जिल्ला कमिटि सदस्य हुनुहुन्छ । पञ्चायती ब्यवस्था होस् वा बहुदल पछिको २०४६ सालको आन्दोलन होस् सशक्त रुपमा आन्दोलन गर्दै समाज परिवर्तनमा विशेष योगदान गर्नुभएका पोख्रेलले पछाडी परेको वडाको मुहार फेर्ने लक्ष्य रहेको बताउनुभयो ।
वडामा अझै पनि फराकिला तथा कालोपत्रे सडक नभएकाले वडावासीलाई समस्या भईरहेको अवस्थामा यसलाई समाधान गर्न आफु लागिपर्ने बताउनुभयो । त्यस्तै वडामा अझै पनि काठेपुल रहेकाले आफु वडाध्यक्षमा निर्वाचित भईसके पछि काठेपुल हटाउने आफ्नो पहिलो प्राथमिकता रहने प्रतिवद्धता व्यक्त गर्नुभयो ।
वडाको सडक, धार्मिक तथा पर्यटन प्रवद्र्धन, शिक्षा क्षेत्र, स्वास्थ्य, कृषि लगायत धेरै विकासका काम गर्न बाँकी रहेको बताउदै पोख्रेलले वडाको समग्र विकास गर्नुपर्नेमा जोड दिनुभयो । भौगोलिक रुपमा ठुलो भएकाले एकिकृत विकास गर्दै आफ्नो कार्यकालमा पछाडी परेको वडालाई ईमान्दारीताका साथ विकसित तुल्याउने बताउनुभयो ।
मतदाताहरुसंग भेटघाट तथा घरदैलो गर्दै घरघर पुग्नुभएका पोख्रलले वडा नं. १० को पटना क्षेत्रका स्थानीय कृषिमा आश्रित रहेकाले कृषकहरुका लागि कृषि सामग्री, मल, औजार लगायतका सामग्री प्रदान गरि कृषिमा आत्मनिर्भर वडा बनाउनेमा जोड दिनुभयो । त्यस्तै पोख्रेलले वडामा सुकुम्वासी समस्या समाधान, उच्च शिक्षाका लागि विशेष पहल, स्वास्थ्य क्षेत्रलाई मजबुत बनाउनका लागि आफुले विशेष पहल गर्ने प्रतिवद्धता व्यक्त गर्नुभयो ।
यस्तै बाणगंगाकै सबैभन्दा विकास निर्माणमा पछाडि परेको वडा नं. १० पट्नामा एमालेको घरदैलो अभियान अन्तिम चरणमा पुगेको छ । सोहि क्रममा आज पट्नाको मिलनचोकमा कोणसभा भएको छ । कोणसभामा बोल्दै एमाले कपिलवस्तुका उपाध्यक्ष विश्राम प्रसाद थारुले एमालेले नजित्दा ५ बर्षमा वडामा विकास निर्माणका काम अधुरै रहेको बताउनुभयो ।
