लुदस, कपिलवस्तु
वाणगंगा नगरपालिका–२ कप्टैयास्थित श्री बालज्योति आधारभूत विद्यालयमा रहेका विभिन्न समस्या पहिचान तथा समाधानका उपायबारे वडा स्तरीय युवा क्लबले छलफल गरेको छ ।
बिहीबार आयोजित कार्यक्रममा विद्यालयको सरसफाइ, शुद्ध पिउने पानी, दिवा खाजाको अवस्था, विद्यार्थीको उपस्थिति, अतिरिक्त क्रियाकलाप, स्थानीय सरकारको सहयोग तथा सूचना प्रविधिमा विद्यार्थीको पहुँचलगायतका विषयमा छलफल गरिएको थियो ।
विद्यालयको शैक्षिक वातावरण सुधार र विद्यार्थीको सिर्जनशीलता विकास गर्ने उद्देश्यले आयोजित कार्यक्रममा ५५ जना विद्यार्थीलाई चित्रकला प्रशिक्षणसमेत प्रदान गरिएको थियो । प्रशिक्षण क्लबका सचिव सुशान्ङ कार्कीले दिएका थिए ।
क्लबका अध्यक्ष विमल घिमिरेको अध्यक्षतामा सम्पन्न कार्यक्रममा विद्यालयका प्रधानाध्यापक गंगा प्रसाद चौधरी प्रमुख अतिथि, विद्यालय व्यवस्थापन समितिका अध्यक्ष सरिता थारु, शिक्षक तथा क्लबका सदस्यहरूको उपस्थिति रहेको थियो । कार्यक्रमको सञ्चालन शिक्षक महेन्द्र भण्डारीले गरेका थिए ।
