हरि आचार्य, कपिलवस्तु
नेकपा माओवादी केन्द्र कपिलवस्तुका सचिवालय सदस्य डा.धर्मराज भट्राई सहित १ सय १ जना एमालेमा प्रवेश गर्नुभएको छ । निर्वाचन परिचालन कमिटि बाणगंगाद्धारा आयोजित वृहत पार्टी प्रवेश कार्यक्रममा विभिन्न पार्टीका १ सय १ जना एमालेमा प्रवेश गरेका हुन् । पार्टी प्रवेश गर्नेमा माओवादीबाट नेतृ लक्ष्मी भट्राई, घनश्याम भट्राई, नेपाली कांग्रेसबाट हिमा भट्राई, ऋषिराम भट्राई, पुजा थारु, जनमोर्चाबाट लाल बहादुर थापा लगायत १ सय १ जनालाई एमाले उपाध्यक्ष बिष्णु पौडेलले टिका लगाएर पार्टीमा स्वागत गर्नुभएको हो ।
नेपाल औषधी व्यवसायी संघका जिल्ला अध्यक्ष समेत रहनुभएका नवप्रवेशी डा. धर्मराज भट्राईले वर्तमान समयको आवश्यकता एमाले पार्टी नै रहेको बताउदै छोटो समयमै एमाओवादीबाट ठूलो समूह एमालेमा आउने दावी गर्नुभयो । नव प्रवेशी भट्टराईले एमाओवादीमा आफुले २० वर्ष ब्यतित गरेको दावी गर्दै प्रचण्डको चितवनको चुनावी सभाको भाषण सुन्दा आफुलाई आत्मग्लानी भएको तर्क गर्दै छोरी हार्दा देश संकटमा पर्ने भाषण गर्नु निकै लज्जास्पद विषय भएको दावी गर्नु भयो ।
