लुदअ, कपिलवस्तु
नेकपा (एमाले) का पोलिट ब्यूरो सदस्य एवम् कपिलवस्तु इन्चार्ज खिमलाल भट्टराईले भाद्र १६ र १७ गते सम्पन्न हुन गैरहेको लुम्बिनी प्रदेशको प्रथम ऐतिहासिक अधिवेशनबाट प्रदेश नेतृत्व सर्वसम्मत चयन हुने बताउनु भयो । युवा नेता भट्टराईले प्रदेश अधिवेशनलाई लिएर पार्टीको मूल नेतृत्व यो वा त्यो वाहानामा विवादमा नआउने र विवादमा जो कोहीले ल्याउन समेत नहुनेमा जोड दिनु भयो । नेता भट्टराईले आवश्यकता र औचित्यताका आधारमा लुम्बिनी प्रदेशको नेतृत्व चयन सर्वसम्मत गछौं कथम कदाचित सर्वसम्मत हुन नसके हार्दिकता पूर्वक लोकतान्त्रिक विधिबाट नेतृत्व चयन हुने जिकिर गर्नु भयो ।
पार्टी अध्यक्ष केपी शर्मा ओलीले समुउद्घाटन गर्ने लुम्बिनी प्रदेशको अधिवेशन पहिलो भएको र यो अधिवेशनबाट देशलाई नै पार्टीले सन्देश दिने दावी गर्नु भयो । युवा नेता खिमलाल भट्टराईले प्रदेश अधिवेशनका निम्ति ४० वर्ष मुनिका युवा पुस्ताको प्रतिनिधीत्व उत्साहजनक रहेको बताउदै प्रदेश कमिटीमा समेत युवा पुस्ताको कमिटीगत जिम्मेवारी सुनिश्चित गरिने दावी गर्नु भयो । नेता भट्टराईले नेकपा (एमाले) बाणगंगा नगर कमिटीले आयोजना गरेको प्रतिनिधी छनोट पश्चातको घोषणा कार्यक्रमलाई शनिवार बाणगंगामा सम्बोधन गर्दै यस्तो धारणा राख्नु भएको हो ।
लुम्बिनी प्रदेश अधिवेशनका लागि कपिलवस्तु जिल्लाबाट महिलाको प्रतिनिधित्व संख्या १७ जना, दलित प्रतिनिधित्व १२ जना र अन्य ४१ जना गरी कूल ७० जनाले प्रदेश अधिवेशनमा प्रतिनिधीको रुपमा सहभागिता जनाउने एमाले जिल्ला अध्यक्ष डम्मर शर्माले जानकारी दिनु भयो ।
सो अधिवेशनका निम्ति बाणगंगा नगर पालिकाबाट ३० जना, बुद्धभूमि नगर पालिकाबाट १३ जना, शिवराज नगर पालिकाबाट ८ जना, कृष्णनगर नगर पालिकाबाट २ जना, कपिलवस्तु नगर पालिकाबाट ४ जना, महाराजगञ्ज नगरपालिकाबाट ३ जना, विजयनगर गाउँपालिकाबाट ४ जना, यशोधरा गाउँपालिकाबाट २ जना, मायादेववी गाउँपालिकाबाट २ जना र शुद्धोधन गाउँपालिकाबाट २ जना प्रतिनिधीको रुपमा छनोट भएको नेकपा (एमाले) जिल्ला निर्वाचन विभागले जनाएको छ ।
