लुदस, कपिलवस्तु
नेकपा (एमाले) प्रतिनिधी सभा निर्वाचन क्षेत्रीय समन्वय कमिटी क्षेत्र नं. १ कपिलवस्तुको प्रथम वैठक जिल्लाको बैरियामा महत्वपूर्ण निर्णय गरी सम्पन्न भएको क्षेत्रीय कमिटीले जनाएको छ । वैठकले तीन महिने वडा केन्द्रित पार्टी निर्माण (जरा) अभियान २०८१ केन्द्रित निर्णयहरु गरेको जनाएको छ । प्रथम वैठकले वडा, पालिका स्तरका वैठक, भेला, प्रशिक्षण सम्पन्न गर्ने निर्णय गरेको छ । बाणगंगा नगर कमिटी वैठक फाल्गुण ११ गते, शुद्धोधन गाउँ कमिटी वैठक फाल्गुण १३ गते, मायादेवी गाउँ कमिटी वैठक फाल्गुण १०.गते सम्पन्न गर्ने निर्णय गरेको जनाएको छ ।
सोही वैठकले वडा तहका वैठक फाल्गुण २० गते भित्र सम्पन्न गर्ने जनाएको छ । वैठकले पार्टी सदस्यता नविकरण तथा विस्तार चैत्र १५ गते भित्र सम्पन्न गर्ने भएको छ । पार्टीलाई प्रविधीसंग जोडन सबै पार्टी सदस्यलाई चैत्र १५ भित्र पार्टीको एप्समा जोडने निर्णय गरेको छ । सोही वैठकले जनप्रतिनिधीको कार्य सम्पादनमा समेत जोड दिदै पार्टीको निर्वाचनको घोषणा पत्रको अध्ययन, समिक्षा गर्ने जनाएको छ ।
सोही वैठकले निर्वाचन क्षेत्रमा रहनु भएका केन्द्र, प्रदेश र जिल्ला, नगर तहका जनसंगठनका अगुवाहरुको प्रशिक्षण फाल्गुण १७ गते सम्पन्न गर्ने जनाएको छ ।
वैठकले वडा तथा टोल स्तरका प्रशिक्षण् फाल्गुण २५ भित्र संचालन गर्ने निर्णय गरेको छ । पार्टीले समुदाय स्तरमै पुगी सुझाव संकलन कार्यका लागि पालिका स्तरमा योजना निर्माण गरी वडा, टोल र बस्ती स्तरमा कार्यान्वयन गर्ने जनाएको छ ।
वैठकलाई सम्बोधन गर्दै एमाले केन्द्रिय सदस्य, कपिलवस्तु इन्चार्ज एवम् प्रदेश सभा सदस्य गिरधारीलाल न्यौपानेले जरा अभियानबाट जनताका सवाललाई पार्टीले सही ढंगले ब्यवस्थापन गर्ने बताउनु भयो। वैठकमा केन्द्रिय लेखा आयोगका उपाध्यक्ष एवम् प्रदेश सभा सदस्य विष्णु पंथीले नेपाली समाजको विकासलाई सही ढंगले बुझनुपर्नेमा जोड दिनु भयो । नेता पंथीले एमाले पार्टीले विगतदेखी नै ऐतिहासिक महत्वपूर्ण जनमुखी निर्णय गर्दै आएको स्पष्ट पार्नु भयो । प्रदेश सभा सदस्य पंथीले कपिलवस्तुको विकासका सन्दर्भमा धेरै महत्वपूर्ण काम भएको तर सिचाईका सन्दर्भमा महत्वपूर्ण कार्य गर्नु पर्नेमा जोड दिनु भयो ।
प्रथम वैठकमा एमाले लुम्बिनी प्रदेश कमिटी सचिवालय सदस्य जंजिर प्रसाद चौधरी, एमाले जिल्ला अध्यक्ष बाबुराम खनाल, एमाले लुम्बिनी प्रदेश कमिटी सदस्यहरु डम्मर शर्मा, चक्रपाणी अर्याल, धर्मराज भुसाल, द्रोणराज सुवेदी, भगवानदास चौधरी लगायतले मन्तब्य राख्नु भएको थियो । वैठक नेकपा (एमले) प्रतिनिधी सभा क्षेत्रीय निर्वाचन परिचालन कमिटीका संयोजक शंकर पाण्डेको अध्यक्षता, सह–संयोजक विश्व कार्कीको स्वागत मन्तब्य र सचिव लक्ष्मण प्रसाद बेल्बासेको संचालनमा सम्पन्न वैठकमा एमाले जिल्ला सचिव सिवि गहतराज, उपसचिव देवी बहादुर पोख्रेलको आतिथ्यता रहेको प्रतिनिधी सभा निर्वाचन क्षेत्रीय समन्वय कमिटी क्षेत्र नं. १ कपिलवस्तुले जनाएको छ ।
