रुपन्देहीको ओमसतिया गाउँपालिकामा नेपाल कम्युनिष्ट पार्टी (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’लाई ७१ केजीको फूलमाला लगाएर सम्मान गरिएको छ।ओमसतिया गाउँपालिका–६ मा रहेको जमुहानि पोखरी तथा मन्दिर व्यवस्थापन समितिले प्रचण्डलाई उनको उमेरको सङ्ख्यालाई जनाउँदै ७१ केजीको माला लगाइदिएको हो।मन्दिर व्यवस्थापन समितिका अध्यक्ष एवं ओमसतिया गाउँपालिका–६ का वडा अध्यक्ष शिवकुमार धवलले माला लगाउने कार्यक्रमबारे जानकारी दिए। सो अवसरमा माओवादी केन्द्रका नेता देवेन्द्र पाण्डेले पूर्वप्रधानमन्त्री तथा पार्टी अध्यक्ष प्रचण्डको योगदानलाई कदर गर्दै सम्मानस्वरूप ७१ किलोको माला अर्पण गरिएको बताए।उनले भने, “प्रचण्डको दीर्घायुको कामना गर्दै उनको योगदानको सम्मानस्वरूप यो माला अर्पण गरिएको हो।” चार कार्यक्रममा सहभागिता बुधबार प्रचण्ड रुपन्देहीका चारवटा कार्यक्रममा सहभागी हुँदै छन्।
उनी विभिन्न स्थानमा आयोजित पार्टी कार्यकर्ता भेला, स्थानीय तहका जनप्रतिनिधिहरूसँग अन्तरक्रिया, विकास योजनासम्बन्धी निरीक्षण तथा अन्य कार्यक्रममा सहभागी हुनेछन्।पछिल्लो समय प्रचण्ड देशभरका विभिन्न स्थानमा भ्रमण गर्दै आएका छन्। विशेषगरी, पार्टी पुनर्गठन, सत्तासमीकरण र स्थानीय तहका विकास योजनालाई प्राथमिकता दिँदै उनी निरन्तर प्रदेश तथा जिल्लास्तरीय कार्यक्रममा सहभागी भइरहेका छन्।
