राष्ट्रिय प्रजातन्त्र पार्टी राप्रपा का अध्यक्ष राजेन्द्र लिङदेनले अबका पुस्ता राजा र राजसंस्था हटाउनुको कारणबारे जानकार रहेको दाबी गरेका छन् ।प्रतिनिधि सभाको सोमबारको बैठकमा आफ्नो धारणा राख्दै अध्यक्ष लिङदेनले गणतन्त्रपक्षधर नेताहरुको शब्दजाल र कथाले मात्र अहिलेको पुस्ता सहमतिमा नआउने दाबी गरे । उनले भने, ुतपाईंहरुको मिथ्यांकन, मिथ्या इतिहासले अब मान्छेले पत्याउनेवाला छैन । अहिलेको सूचना प्रविधिको विकास, डिजिटल युगबाट युवा राम्रोसँग परिचित छ ।ु
राजा हटाउनेको कारणबारे युवा पुस्ताले थाहा पाइसकेको दावी गर्दै उनले राजा हटेलगत्तै नारायणहिटीमा व्यापार सुरु गर्नुले पनि गणतन्त्र किन चाहिएको रहेछ भन्ने स्पष्ट भएको दाबी गरे । राजा हटाएर देशमा गणतन्त्र र लोकतन्त्रको नाममा नेताहरुले लुटतन्त्र मच्चाइरहेको आरोप लगाउँदै लिङदेनले आठ वर्ष अगाडी देशको राष्ट्रिय ऋण ६ खर्ब रहेकोमा अहिले २७ खर्ब पुगेकाले पनि व्यवस्था कुन ठिक भन्ने स्पष्ट पारेको दाबी गरे ।
लिङ्देनले भने,यो पैसामध्ये कति विकासमा गयो र कति तपाईंको पेट भर्नमा गयो भन्ने कुरा जनतालाई राम्ररी थाहा छ । तपाईंले गणतन्त्रका नाममा आकाशमा उठाउन नमिल्ने प्लेन किनेर खानु भएको कमिशन, तपाईंले प्लेन बसाउन नमिल्ने एयरपोर्ट बनाएको कुरा राम्ररी हेरेको छ जनताले । तपाईंले नेपाली युवालाई भुटानी शरणार्थी बनाएर आफ्नो व्यापार चलाउन खोजेको कुरा जनताले हेरिराखेको छ . नेताहरुको व्यवहारका कारण गणतन्त्रको विरोध सुरु भएको चर्चा गर्दै उनले जनताले चाहे गणतन्त्र फालेर राजतन्त्र स्थापना हुने दाबी गरे । त्यसैले युवा र जनताको शक्तिलाई नहोच्याउँन उनको आग्रह थियो ।