स्कटल्यान्ड भ्रमणमा नेपालका प्रमुख दुई अलराउन्डर सोमपाल कामी र गुल्शन झा चोटका कारण टिमबाट बाहिरिएपछि तीन युवा खेलाडीहरुले मौका पाए । उनीहरुको प्रतिस्थापनका रुपमा लोकेश बम, रुपेश सिंह र किरण ठगुन्नालाई स्कटल्यान्ड पठाइएको थियो ।
त्रिकोणात्मक टि २० सिरिजको पहिलो दुई म्याचमा उनीहरु तीनैजनाले अवसर पाए । तर कसैले पनि आफूलाई पाएको अवसर सदुपयोग गर्न सकेनन् । प्रतिस्थापनमा गएका खेलाडीहरु दुवै म्याचमा नचल्दा नेपाली टिममाथि नै प्रेसर परेको छ । गुल्शन र सोमपालको कमि दुवै म्याचमा खट्कियो ।
नेदरल्यान्ड्सविरुद्ध नेपालको पहिलो म्याच ऐतिहासिकरुपमा प्रतिस्पर्धात्मक बनेको थियो । नतिजाका लागि तीनवटा सुपरओभर खेलाउनुपर्यो । अन्ततः तेस्रो सुपरओभरमा नेपालले नेदरल्यान्ड्सलाई नतिजा सुम्पिए । उक्त हारमा युवा व्याटर रुपेश सिंह जिम्मेवार देखिन पुगे ।
पहिलो बलमै कप्तान रोहित पौडेल ठूलो सटको चक्करमा आउट भएपछि नेपालले सरप्राइज निर्णय लिँदै रुपेशलाई ब्याटिङमा पठाएको थियो । कुनै अन्तर्राष्ट्रिय अनुभव नभएका ब्याट्सम्यानलाई यति धेरै प्रेसरको अवस्थामा सुपरओभर खेल्न पठाउने टिमको निर्णयमा धेरै प्रश्नहरु उठेका छन् ।
जे भए पनि रुपेशसँग अवसर थियो, आफूलाई यो लेभलमा प्रमाणित गर्ने । तर उनी चुके । उनले लगातार दुई बल डट खेले भने तेस्रो बलमा आउट भए । नेपालले यो सुपरओभरमा कुनै पनि रन जोड्न सकेन ।
नियमित २० ओभरको खेलमा रुपेश १४ बलमा एक छक्का र एक चौकासहित १९ रन जोडेका थिए । आशालाग्दो सुरुवात गरे पनि उनले त्यसलाई कन्भर्ट गर्न सकेनन् र गलत समयमा आउट भए जतिबेला नेपाललाई एउटा बलियो साझेदारीको खाँचो थियो ।
अर्को इन्डमा रहेका कप्तान रोहित पौडेलको सहयोगी भूमिका खेल्नुपर्नेमा आफैं ठूलो हिट गर्न खोज्दा उनले विकेट गुमाएका थिए । उनको विकेट लिएसँगै खेलमा नेदरल्यान्ड्स हावी भएको थियो ।
सो म्याचमा रुपेशसँगै डेब्यू गरेका थिए किरण ठगुन्नाले । उनले कुनै प्रभाव पार्न सकेनन् । घरेलु प्रतियोगिताहरुमा राम्रो प्रदर्शन गर्दै आएका किरणको अन्तर्राष्ट्रिय डेब्यू भने विर्सनलायक नै बन्यो । २५ बल खेल्दा उनले १५ रन मात्रै जोड्न सके । उनी पनि ठूलो सट खेल्ने चक्करमा आउट भएका थिए । किरणले थुप्रै डट बलहरु खेल्दा नेपाललाई रन रेटको दवाव बढेको थियो ।
यी दुवै ब्याटरहरुले दोस्रो म्याचमा स्कटल्यान्डविरुद्ध पनि पाएको मौका खेर फाले । नेपालले ९८ रनको झिनो लक्ष्य पछ्याइरहेको थियो तर कठिन पिचमा ब्याट्सम्यानहरुलाई सजिलो थिएन । यस्तोमा सातौं क्रममा आएका किरण र आठौं क्रममा आएका रुपेश दुवैसँग सम्हालिएर ब्याटिङ गर्दै नेपाललाई जितसम्म डोहोर्याउने चुनौति थिए । उनीहरु दुवै यसमा चुके ।
रुपेश ७ बलमा तीन रन मात्रै जोडेर सातौं विकेटका रुपमा पेभिलियन फर्किएका थिए । ठगुन्नाले भने क्रिजमा टिक्ने प्रयास गरे । तर अन्तिम ओभरको चौंथो बलमा अनावश्यकरुपले छक्का हान्ने प्रयास गर्दा उनी आउट भए । नेपाललाई तीन बल बाँकी छँदा जितका लागि एक रन मात्रै चाहिएको अवस्थामा किरणले ठूलो सट खेल्ने धृष्टता गरेका थिए । जसले गर्दा उनी ‘विनिङ रन’ हान्ने वञ्चित भए ।
यस्तै, तेस्रो प्रतिस्थापन खेलाडी लोकेश बम पनि चल्न सकेका छैनन् । उनलाई दुवै म्याचमा नेपालले ओपनिङमै उतारेको थियो । आसिफ शेखलाई बाहिर राखेर कुशल भुर्तेलको जोडी बनाइएका लोकेश दूई म्याचमा क्रमशः शून्य र नौ रनमा आउट भए ।
लोकेशको क्षमतामा शंका छैन । उनले एनपीएलदेखि अन्तर्राष्ट्रिय प्रतियोगिताहरुमा समेत आफूलाई प्रमाणित गरिसकेका छन् । खासगरि उनी टि २० कै लागि बनेका ब्याट्सम्यान हुन् । तर, विदेशी मैदान र प्रतिकुल कन्डिसनमा उनी अभ्यस्त हुन बाँकी नै छ ।
नेपालले आफ्नो प्रमुख फास्ट बलर नन्दन यादवलाई पनि चोटका कारण गुमाएको छ, जसले गर्दा बाँकी खेलहरुमा नेपालको फास्ट बलिङ कमजोर बन्न पुगेको छ । रुपेश फास्ट बलिङ अलराउन्डर हुन् । पहिलो खेलमा उनलाई कप्तानले बलिङमा पनि उतारेका थिए । तर, उनले कुनै प्रभाव देखाउन सकेनन् । ३ ओभर बलिङ गरेका उनले ३१ रन खर्चेर विकेटविहीन रहे ।
