रुसको कामचत्काको पूर्वी तटमा शुक्रबार बिहान शक्तिशाली भूकम्प गएको छ । स्थानीय समयानुसार बिहान ७.८ म्याग्निच्युडको भूकम्पपछि लगातार पाँच वटा पराकम्प गएको र तीमध्ये केही ५.८ म्याग्निच्युडसम्म पुगेको बताइएको छ ।भूकम्पपछि सुनामीको चेतावनी जारी गरिएको छ । समुद्री तटमा ३० देखि ६२ सेन्टिमिटरसम्म उचाइका लहर देखिएका छन् । यद्यपि अहिलेसम्म ठूलो क्षतिको विवरण आएको छैन ।
कामचत्काका गभर्नर भ्लादिमिर सोलोदोभले सबै आपतकालीन सेवालाई उच्च सतर्कतामा राखिएको बताए । अमेरिकी भूवैज्ञानिक सर्वेक्षणका अनुसार भूकम्पको केन्द्रविन्दु पेट्रोपावलोभ्स्क(कामचत्स्की शहरदेखि करिब १२८ किलोमिटर टाढा र जमिनको सतहदेखि १० किलोमिटर मुनि रहेको थियो ।
रुसको स्टेट जियोफिजिकल सर्भिसले प्रारम्भिक रूपमा भूकम्पलाई ७.८ म्याग्निच्युड भने पनि पछि ७.४ म्याग्निच्युडमा संशोधन गरिएको जनाएको छ । सामाजिक सञ्जालमा सार्वजनिक भएका भिडियोहरूमा घरभित्र फर्निचर र बिजुलीका बल्ब हल्लिएको, सडकमा गुडिरहेका कारसमेत शक्तिशाली कम्पनले प्रभावित भएको देखिन्छ ।