सरिता थारु, कपिलवस्तु । बाणगंगा नगरपालिका वडा नं। ६ लक्ष्मणघाटमा अवस्थित कृषि तथा पशु विकास बहुउद्देश्यीय सहकारी संस्था लिमिटेडको १३औँ वार्षिक साधारण सभा तथा ५औँ अधिवेशन भव्य रूपमा सम्पन्न भएको छ।
कार्यक्रमका प्रमुख अतिथि बाणगंगा नगरपालिका वडा नं। ६ का वडा अध्यक्ष करुण टण्डनले देशलाई समृद्ध बनाउने आधार कृषि क्षेत्र भएको उल्लेख गर्दै कृषि क्रान्तिको आवश्यकता औंल्याउनुभयो। उहाँले कृषकलाई उत्पादनदेखि बजारीकरणसम्म सहजीकरण गर्न स्थानीय तह र सहकारीबीच सहकार्य आवश्यक रहेको बताउँदै सहकारीले कृषकको जीवनस्तर उकास्न महत्वपूर्ण भूमिका खेलेको धारणा राख्नुभयो।
यस्तै कार्यक्रममा बाणगंगा नगरपालिकाको पशु विकास शाखा प्रमुख राजकुमार तिवारीले आधुनिक कृषि र पशुपालन प्रविधि अपनाउनुपर्नेमा जोड दिनुभयो। उहाँले सहकारीमार्फत पशुपालक कृषकलाई तालिम, प्राविधिक सहयोग र पशु स्वास्थ्य सेवामा पहुँच विस्तार गर्न सकिने बताउँदै सहकारीसँग सहकार्य गर्न नगरपालिका तयार रहेको जानकारी गराउनुभयो।
समाजसेवी हुमनाथ भट्टराईले सहकारी अभियानले ग्रामीण अर्थतन्त्रलाई मजबुत बनाएको उल्लेख गर्दै सदस्यहरूको सक्रिय सहभागिताले मात्र सहकारी दिगो बन्ने बताउनुभयो। उहाँले पारदर्शिता, अनुशासन र सामूहिक भावनाले सहकारीलाई सफल बनाउने मुख्य आधार भएको धारणा व्यक्त गर्नुभयो।
कार्यक्रममा संस्थाका अध्यक्ष खड्ग बहादुर थापाले आगामी नीति तथा कार्यक्रम प्रस्तुत गर्दै कृषकको आयआर्जन वृद्धि गर्न कृषि उत्पादनको प्रवर्द्धन र आधुनिकीकरणमा जोड दिइने बताउनुभयो। उहाँले आधुनिक कृषि औजार सहयोग, मकै खेतीको उत्पादन वृद्धि तथा त्यसको बजारीकरणको सुनिश्चितताका लागि सहकारीले विशेष योजना ल्याउने जानकारी दिनुभयो।
साधारण सभामा संस्थाको प्रगति प्रतिवेदन सचिव चन्द्रमणी क्षेत्रीले प्रस्तुत गर्नुभएको थियो भने कोषाध्यक्ष अपिला भुषालले आर्थिक वर्ष २०८१र०८२ का लागि १ करोड ९२ लाख ३७ हजार रुपैयाँ बराबरको आय–व्यय विवरण प्रस्तुत गर्नुभयो। यस्तै लेखा सुपरिवेक्षण समितिको प्रतिवेदन समिती सदस्य थानेश्वर भट्टराईले प्रस्तुत गर्नुभएको थियो। प्रस्तुत सबै प्रतिवेदन साधारण सभाबाट सर्वसम्मत रूपमा पारित गरिएको छ।
“सहकारीमा लगानी, सबैका लागि आर्थिक समृद्धि” भन्ने मूल नारालाई आत्मसात गर्दै अघि बढिरहेको यस सहकारीमा हाल ३ सय ६६ जना शेयर सदस्य आबद्ध रहेका छन्।
कार्यक्रमको अवसरमा असल बचत कर्ता, असल ऋणी, असल दुग्ध कृषक र असल बाल बचत कर्तालाई नगद सहित सम्मान पत्र र दोसल्ला ओढाएर सम्मान समेत गरिएको छ ।
सहकारीका अध्यक्ष खड्ग बहादुर थापाको अध्यक्षता, सचिव चन्द्रमणी क्षेत्रीको सञ्चालन तथा उपाध्यक्ष रामचन्द्र मरासिनीको स्वागत मन्तव्यमा सम्पन्न कार्यक्रमको अन्त्यमा ५औँ अधिवेशनसमेत सम्पन्न गरिएको थियो।
अधिवेशनले चन्द्रमणी क्षेत्रीको अध्यक्षतामा ११ सदस्यीय नयाँ कार्यसमिति सर्वसम्मत रूपमा चयन गरेको छ। जसको उपाध्यक्षमा रामचन्द्र मरासिनी, सचिवमा ध्रुवराज ज्ञवाली र कोषाध्यक्षमा अपिला भुषाल टण्डन चयन हुनुभएको छ। सदस्यहरूमा शेर बहादुर खनाल, सन्तोष प्रताप राणा, कोपिला भट्टराई, हिरालाल चौधरी, शशिधर सापकोटा, सरस्वती न्यौपाने र अनिता खनाल रहनुभएको छ।
नव निर्वाचित अध्यक्ष क्षेत्रीले सहकारीलाई थप प्रभावकारी, पारदर्शी र कृषकमैत्री बनाउँदै लैजाने प्रतिबद्धता व्यक्त गर्नु भएको छ।
