श्याम सि.टी, दुबई ।
थारू भाषा, कला, संस्कृति तथा मौलिक पहिचानको संरक्षण र संवर्धन गर्ने उद्देश्यसहित थारू कल्याणकारी सभा यूएईद्वारा “थारू कला संस्कृति हाम्रो पहिचान, यसलाई संरक्षण र प्रवर्द्धन गर्ने हाम्रो अभियान” भन्ने मूल नाराका साथ १२औँ वार्षिक भेला तथा माघी पर्व एवं थारू नयाँ वर्ष २६४९ दुबईमा विविध सांस्कृतिक कार्यक्रमका साथ भव्य रूपमा सम्पन्न भएको छ।
प्रवासमा रहेर पनि आफ्नो धर्म, संस्कार, परम्परा र सांस्कृतिक पहिचान जगेर्ना गर्ने दृढ संकल्पका साथ विगतका वर्षहरूझैँ यस वर्ष पनि कार्यक्रमलाई निरन्तरता दिइएको हो।
कार्यक्रम संयोजक महेश चौधरीले माघी पर्वको ऐतिहासिक महत्व, सामाजिक मूल्य र विशेषतामाथि प्रकाश पार्दै उपस्थित सम्पूर्ण अतिथि तथा सहभागीहरूलाई स्वागत गरेका थिए। कार्यक्रमको औपचारिक उद्घाटन आदिवासी जनजाति महासंघ ९नेफिन० यूएईका अध्यक्ष भागरथी कुमार भगतको प्रमुख आतिथ्यतामा उपस्थित विशिष्ट अतिथि, बुद्धिजीवी तथा समाजसेवीहरूको सामूहिक दीप प्रज्वलनमार्फत सम्पन्न भयो।
माघी पर्वको शुभकामना सन्देशका क्रममा वक्ताहरूले माघी पर्वको सांस्कृतिक, सामाजिक तथा ऐतिहासिक महत्वमाथि चर्चा गर्दै जातीय भाषा, संस्कृति र भेषभूषाको संरक्षणका लागि प्रवासमा गरिएको यस अभियानप्रति थारू कल्याणकारी सभा यूएईको प्रशंसा व्यक्त गरे।
प्रमुख अतिथि भागरथी कुमार भगतले थारू भाषा, कला र संस्कृतिको संरक्षण नगरे पहिचान नै संकटमा पर्न सक्ने भन्दै यसप्रति सबै थारू समुदाय एकजुट हुनुपर्नेमा जोड दिनुभयो।
कार्यक्रममा नेपालबाट आमन्त्रित चर्चित गायक खेम चौधरीको आकर्षक सांगीतिक प्रस्तुति रहेको थियो भने स्थानीय कलाकारहरू केशव राज महतो, कृष्ण गुन्जन र श्याम सिटीले पनि उत्कृष्ट प्रस्तुति दिएर माहोल थप उल्लासमय बनाएका थिए।
दुबईस्थित अष्टोरिया होटलको क्लब एभरेष्ट सभाहलमा सम्पन्न उक्त कार्यक्रम नेफिन यूएईका अध्यक्ष भागरथी कुमार भगतको प्रमुख आतिथ्यता र रामानन्द चौधरीको अध्यक्षतामा सम्पन्न भएको थियो। कार्यक्रममा विभिन्न संघ–संस्थाका प्रतिनिधिहरूको विशेष उपस्थिति रहेको थियो। कार्यक्रम सञ्चालन कुशल कार्यक्रम प्रस्तोता केशव राज महतो र दिव्या चौधरीले गरेका थिए।
थारू समुदायको सांस्कृतिक चेतना, एकता र पहिचानलाई अन्तर्राष्ट्रिय स्तरमा प्रवर्द्धन गर्ने उद्देश्यले आयोजना गरिएको यो कार्यक्रमले प्रवासमा पनि थारू संस्कृतिको उज्यालो पहिचान कायम राख्न महत्वपूर्ण योगदान पुर्याएको सहभागीहरूको भनाइ थियो।
