लुदस, जितपुर ।  कपिलवस्तु । नेकपा (एमाले ) बाणगङ्गा नगरपालिका–६ वडा कमिटीको निर्वाचन लक्षित विस्तारित बैठक आज सम्पन्न भएको छ।

कार्यक्रममा बोल्दै प्रमुख अतिथि लुम्बिनी प्रदेश कमिटी सदस्य तथा निर्वाचन परिचालन कमिटी क्षेत्र न १ का संयोजक डम्बर शर्माले देश निर्वाचनमय अवस्थामा रहेको उल्लेख गर्दै एमालेका उमेदवारलाई बिजयी गराउन सबै नेता तथा कार्यकर्ता लाग्नु पर्ने बताउनु भयो । जेन्जी (Gen-Z) पुस्ताको भावना नेकपा एमालेको पनि भावना भएको बताउनुभयो। उहाँले पछिल्लो चरणमा देखिएको जेन्जी आन्दोलनको भावनालाई केही गलत तत्वद्वारा हाइज्याक गरिएको टिप्पणी गर्नुभयो।
शर्माले अब देश र जनजीविकाका सवालमा एमाले सधैँ सचेत रहेको भन्दै युवा पुस्तालाई आ–आफ्नो टोल र समुदायबाट उत्प्रेरित गर्न आवश्यक रहेको धारणा राख्नुभयो। नेतृत्वको कार्यशैलीमा कमी कमजोरी भए कार्यकर्तामाझ गएर माफी माग्न पनि नेतृत्व तयार हुनुपर्ने उल्लेख गर्दै उहाँले नेतृत्वप्रति कुनै आशंका नराखी एकताबद्ध भएर अघि बढ्न आग्रह गर्नुभयो।

बैठकमा नेकपा ( एमाले ) जिल्ला अध्यक्ष बाबुराम खनालले पार्टीभित्र गलत सूचना सम्प्रेषण गरी भ्रम सिर्जना गर्ने प्रयास भइरहेको बताउनुभयो। राष्ट्रियताको सवालमा नेकपा एमाले सधैँ अब्बल पार्टी रहेको उल्लेख गर्दै उहाँले अहिले अग्रगमन र पश्चगमनबीचको लडाइँ चलिरहेको धारणा राख्नुभयो। “नेपाल रहे मात्रै नेपाली रहन्छौँ,” भन्दै उहाँले एमालेका उम्मेदवारलाई जिताउन सबैलाई आग्रह गर्नुभयो।
प्रतिनिधिसभा सदस्यका प्रत्यासी विश्राम प्रसाद चौधरीले आगामी निर्वाचनमा एमाले उम्मेदवारलाई जिताउन सबै कार्यकर्ता गाउँ–टोल केन्द्रित भएर लाग्नुपर्ने बताउनुभयो। हामीहरु कसैप्रती आरोप प्रत्यारोप भन्दा पनि पार्टीले गरेका जनमुखी कामहरुको बारेमा जनतालाई अवगत गराउदै आफ्नो पार्टी प्रती आकर्षण गराउन लाग्नुपर्ने बताउनु भयो ।

उहाँले आसन्न निर्वाचनमा घरायसी कामलाई व्यवस्थापन गर्दै पार्टीको पक्षमा जनमत जुटाउन सबैलाई सक्रिय हुन आग्रह गर्नुभयो र उत्साहका साथ लाग्ने सबैप्रति धन्यवाद व्यक्त गर्नुभयो । बैठक नेकपा (एमाले) बाणगङ्गा वडा न ६ का सचिव देबी पोख्रेलको अध्यक्षता, नेकपा एमाले प्रदेश कमिटी सदस्य तथा निर्वाचन परिचालन कमिटी क्षेत्र नं. १ का संयोजक डम्बर शर्माको प्रमुख आथित्यता,प्रदेश कमिटी सदस्य धर्म भुसाल, नेकपा (एमाले) जिल्ला अध्यक्ष बाबुराम खनाल, प्रतिनिधिसभा सदस्य उम्मेदवार विश्राम प्रसाद चौधरी, पार्टी जिल्ला सचिवालय सदस्य रिता कुमारी चौधरी, जिल्ला कमिटी सदस्यहरू हुमनाथ भट्टराई र थानेश्वर अधिकारी, नेकपा ( एमाले) बाणगङ्गा नगर अध्यक्ष सोम अर्याल, नगर सचिवालय सदस्य सुकदेव थारु, नमनारायण न्यौपाने, चुरामणी आचार्य,माधव खनाल,कल्लु थारु, लेमबहादुर गुरुङ,कृष्ण गैरे,दिनेश रन्जन लगायतको आतिथ्यतामा सम्पन्न भेलाको सञ्चालन उपसचिव निर्मला अधिकारीले गर्नुभएको थियो।
साथै भेलाले निर्वाचन लक्षित बिभिन्न कार्ययोजना निर्माण गरेको छ ।