तौलिहवा । युनिक एग्रो सेन्टर तथा रुपक भेट फर्माको आयोजनामा सोमबार रघुनाथ आधारभूत बिद्यालय, रजवापुरमा “अभिभावक शिक्षा तथा विद्यार्थी उत्प्रेरणा कार्यक्रम” भव्य रूपमा सम्पन्न भएको छ।
विद्यार्थीहरूको सर्वाङ्गीण विकास तथा अभिभावकको सकारात्मक भूमिकालाई केन्द्रमा राखेर आयोजित कार्यक्रममा वडा नं. १ का वडाअध्यक्ष, विद्यालय व्यवस्थापन समितिका पदाधिकारी, शिक्षक, विद्यार्थी तथा अभिभावकहरूको उल्लेखनीय सहभागिता रहेको थियो।
कार्यक्रमका प्रमुख प्रशिक्षक देव मिश्रले विद्यार्थीहरूलाई अध्ययनप्रति रुचि बढाउने, आत्मविश्वास अभिवृद्धि गर्ने तथा लक्ष्यप्रति दृढ बन्न प्रेरणादायी प्रशिक्षण दिएका थिए। साथै उनले अभिभावकहरूलाई बालबालिकाको उज्ज्वल भविष्य निर्माणमा परिवारको भूमिका, जिम्मेवारी र सकारात्मक वातावरणको महत्वबारे व्यवहारिक सुझाव दिएका थिए।
विद्यालय प्रशासनले कार्यक्रमलाई प्रभावकारी र उपलब्धिमूलक भएको जनाएको छ। कार्यक्रममा सहभागी अभिभावकहरूले यस्ता कार्यक्रमले बालबालिकाको शैक्षिक, नैतिक तथा व्यवहारिक विकासमा सकारात्मक प्रभाव पार्ने विश्वास व्यक्त गरेका थिए।
कार्यक्रममा बोल्दै आयोजक संस्थाका प्रमुख रुपक गुप्ताले आफू सानै उमेरदेखि सामाजिक सेवाभावले प्रेरित हुँदै समाजका विभिन्न क्षेत्रमा योगदान गर्दै आएको बताए। उनले आगामी दिनमा पनि शिक्षा, स्वास्थ्य तथा सामाजिक चेतनामूलक कार्यक्रमलाई निरन्तरता दिने प्रतिबद्धता व्यक्त गरे।
रुपक गुप्ताको अध्यक्षतामा सम्पन्न कार्यक्रमको स्वागत मन्तव्य सुदिप भुसालले व्यक्त गरेका थिए।
