पुर्णचन्द्र परियार, बाणगंगा ।
कपिलवस्तुको बाणगंगा नगरपालिका–२ राजपुरमा जारी तेस्रो “डि.वाई.सी कप” खुल्ला नकआउट फुटबल प्रतियोगिताको सेमिफाइनल समीकरण पूरा भएको छ । आइतबार सम्पन्न सेमिफाइनल खेलमा फ्रीडम फाउन्डेसनलाई पराजित गर्दै लभ नेपाल,पिपरा तथा दर्पण युवा क्लबलाई हराउँदै राजेश स्मृति फाउण्डेसन,चारनम्बर फाइनलमा प्रवेश गरेका हुन् ।
दर्पण युवा क्लब बाणगंगा–२ को आयोजनामा गत मंगलबारदेखि सञ्चालन भइरहेको प्रतियोगिता “देशको सर्वाङ्गिण विकास, दर्पण युवा क्लबको प्रयास” भन्ने नारासहित अघि बढिरहेको छ । प्रतियोगितामा विभिन्न क्षेत्रका १२ वटा फुटबल क्लबहरूको सहभागिता रहेको आयोजकले जनाएको छ ।
क्लबका अध्यक्ष हरिप्रसाद घिमिरेले खेलकुदले युवालाई अनुशासित, स्वस्थ र सकारात्मक दिशातर्फ उन्मुख गराउने विश्वाससहित प्रतियोगिता आयोजना गरिएको बताए ।
त्यस्तै खेल संयोजक थानेश्वर सापकोटाले आइतबार सेमिफाइनलका खेलहरू सफलतापूर्वक सम्पन्न भएको जानकारी दिँदै प्रतियोगिताको फाइनल भिडन्त जेठ १२ गते हुने बताए ।
प्रतियोगिताको विजेता टोलीले नगद ५१ हजार रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेताले नगद ३० हजार रुपैयाँसहित पुरस्कार हासिल गर्नेछन् । सेमिफाइनलमा पराजित हुने दुई टोलीलाई नगद ५–५ हजार रुपैयाँ तथा प्रमाणपत्र प्रदान गरिने आयोजकले जनाएको छ । साथै उत्कृष्ट खेलाडी, उत्कृष्ट गोलरक्षक, सर्वाधिक गोलकर्ता लगायत विभिन्न विधामा समेत पुरस्कार वितरण गरिनेछ ।
प्रतियोगितामा मनकामना सामुदायिक वन उपभोक्ता समूह मुख्य प्रायोजक तथा वैजलपुर जनकल्याण सामुदायिक वन उपभोक्ता समूह सह–प्रायोजकको रूपमा रहेका छन् । विभिन्न संघसंस्था तथा व्यक्तिहरूको आर्थिक सहयोगसमेत प्रतियोगितामा रहेको आयोजकले जनाएको छ ।
यसैबीच प्रतियोगितालाई थप रोचक बनाउने उद्देश्यले आइतबार १५ वर्षमुनिका खेलाडीहरूको खेलसमेत सञ्चालन गरिएको थियो, जसमा दर्पण रातो समूह विजेता बनेको छ । साथै ४० वर्षमाथिका खेलाडीहरूको प्रतियोगिता पनि आयोजना गरिने भएको छ । उक्त प्रतियोगितामा चार टोलीले सहभागिता जनाएका छन् भने खेल जेठ ११ गते सञ्चालन हुने क्लबले जनाएको छ । विजेता र उपविजेता टोलीलाई बोका पुरस्कार प्रदान गरिनेछ ।
स्थानीय दर्शकहरूको उत्साहजनक उपस्थितिले प्रतियोगिता थप आकर्षक बनेको छ । बालबालिकादेखि वृद्धवृद्धासम्मको सक्रिय सहभागिताले दर्पण युवा क्लबको आयोजनाप्रति स्थानीय समुदायको अपनत्व र समर्थन झल्किएको छ ।