थानेश्वर अधिकारी । नेपाली लोकदोहोरी गीत क्षेत्रमा नयाँ प्रतिभाको खोजी तथा प्रोत्साहन गर्ने उद्देश्यले राष्ट्रिय लोक तथा दोहोरी गीत प्रतिष्ठान लुम्बिनी प्रदेशले आयोजना गर्न लागेको बहुप्रतिक्षित एकल गायन प्रतियोगिता “प्रथम लुम्बिनी लोकतारा–२०८३” अन्तर्गत कपिलवस्तु जिल्लाको अडिसन आगामी २०८३ साल जेठ ३० गते शनिबार इटालियन होटल, बडहरा, कपिलवस्तुमा सम्पन्न हुने भएको छ।
लोकदोहोरी गीत तथा गायन क्षेत्रमा रुचि, क्षमता र सपना बोकेका प्रतिभाशाली युवायुवतीहरूलाई आफ्नो कला प्रस्तुत गर्ने सुनौलो अवसर प्रदान गर्ने उद्देश्यले कार्यक्रम आयोजना गरिएको आयोजकले जनाएको छ। गाउँघरमा लुकेर रहेका प्रतिभाहरूलाई खोजी गर्दै उनीहरूलाई प्रदेश तथा राष्ट्रिय स्तरसम्म पुर्याउने अभियानस्वरूप प्रतियोगिता सञ्चालन गर्न लागिएको हो।
प्रतियोगितामा सहभागी हुन चाहने इच्छुक व्यक्तिले उमेर, क्षेत्र वा अनुभवको कुनै बन्देज बिना आफ्नो प्रतिभा प्रस्तुत गर्न सक्नेछन्। जिल्ला अडिसनबाट उत्कृष्ट ठहरिएका प्रतिभाले आगामी २०८३ साल असार ७ गते बिश्व संगीत दिवस- २०२६ को अवसरमा राष्ट्रिय लोक तथा दोहोरी गीत प्रतिष्ठान लुम्बिनी प्रदेशद्वारा आयोजना हुने “प्रथम लुम्बिनी लोकतारा–२०८३” को फाइनल प्रतियोगितामा सहभागिता जनाउने अवसर प्राप्त गर्नेछन्। आयोजकका अनुसार फाइनल प्रतियोगितामा प्रदेशभरका उत्कृष्ट प्रतिभाबीच प्रतिस्पर्धा हुने छ।
उक्त कार्यक्रमको आयोजक राष्ट्रिय लोक तथा दोहोरीगीत प्रतिष्ठान नेपाल,लुम्बिनी प्रदेश कार्यसमिति रहेको छ भने सह–आयोजक राष्ट्रिय लोक तथा दोहोरीगीत प्रतिष्ठान नेपाल,जिल्ला कार्यसमिति, कपिलवस्तु रहेको प्रतिष्ठान कपिलवस्तुका अध्यक्ष असिम क्षेत्रीले बताए । प्रतियोगिताका उत्कृष्ट प्रतिभाहरूलाई क्रमश: प्रथम पुरस्कार ५२,२२२,दिर्तिय पुरस्कार ३२,२२२ र तृतीय पुरस्कार २२,२२२ नगद र प्रमाणपत्र रहेको अध्यक्ष क्षेत्रीले बताएका छ्न । यसै गरी आगामी जेठ ३० गते कपिलवस्तु हुने एक गायन प्रतियोगिता तथा कपिलवस्तु अडिसनमा उत्कृष्ट ३ जनालाई पनि पुरस्कार तथा प्रमाण पत्रको ब्यवस्था गरिएको प्रतिष्ठान कपिलबस्तुका सचिव भक्तिराम घिमिरेले बताएका छ्न् । जसमा प्रथम पुरस्कार ५००० दिर्तिय पुरस्कार ३००० र तृतीय पुरस्कार २००० रहेको सचीव घिमिरेले बताए । उनका अनुसार जिल्ला अडिसनमा उत्कृष्ट हुने प्रतियोगीले असार ७ गते कपिलवस्तु हुन गैरहेको प्रथम लुम्बिनी लोकतारा – २०८३ मा सहभागी हुन पाउनेछन् ।
लोकदोहोरी कला र संस्कृतिको संरक्षण, प्रवर्द्धन तथा नयाँ पुस्तालाई यसतर्फ आकर्षित गर्ने उद्देश्यले आयोजना हुन लागेको कार्यक्रमले कपिलवस्तु जिल्लाको सांगीतिक माहोललाई थप उत्साहित बनाउने अपेक्षा गरिएको छ। पछिल्लो समय आधुनिक संगीतको प्रभाव बढिरहेका बेला मौलिक लोकसंस्कृति जोगाउन यस्ता प्रतियोगिताले महत्वपूर्ण भूमिका खेल्ने स्थानीय कलाकारहरूको विश्वास रहेको छ।
आयोजकले सम्पूर्ण कलाकार, संगीतप्रेमी, लोकदोहोरी पारखी तथा नयाँ प्रतिभाहरूलाई कार्यक्रममा सहभागी भई आफ्नो प्रतिभा प्रस्फुटन गर्न हार्दिक अनुरोध समेत गरेको छ।
