बुटवल । नेपाली मौलिक कला, लोकभजन तथा चुट्का संस्कृतिको संरक्षण र प्रवर्द्धनमा क्रियाशील राष्ट्रिय लोकभजन चुट्का संरक्षण प्रतिष्ठान नेपाल लुम्बिनी प्रदेश समितीको दोस्रो अधिवेशन आगामी २०८३ साल जेठ २३ गते शनिबार बुटवलमा आयोजना हुने भएको छ ।
प्रतिष्ठानले बुटवलस्थित अक्फोर्ड बोर्डिङ स्कुलको सभाहलमा अधिवेशन आयोजना गर्न लागेको हो । अधिवेशनमा लुम्बिनी प्रदेशका १२ वटा जिल्लाबाट प्रतिनिधि तथा कला प्रेमीहरूको उल्लेखनीय सहभागिता रहने आयोजकले जनाएको छ ।
प्रतिष्ठानका लुम्बिनी प्रदेश अध्यक्ष काशिराम पोख्रेलका अनुसार अधिवेशनमा ५० जना आजीवन सदस्य बराबर १ जना प्रतिनिधि तथा १०० जना साधारण सदस्य बराबर १ जना प्रतिनिधि छनोट भई सहभागी हुनेछन् । साथै सम्बन्धित जिल्लाका अध्यक्षहरू स्वतः प्रतिनिधि रहने व्यवस्था गरिएको उनले जानकारी दिए ।
अध्यक्ष पोख्रेलले अधिवेशनलाई भव्य, सभ्य र उपलब्धिमूलक बनाउन विभिन्न विषयगत समिति गठन गरी तयारीलाई तीव्र पारिएको बताए । “लोकभजन, चुट्का र मौलिक नेपाली संस्कृतिको संरक्षण हाम्रो साझा दायित्व हो । यही उद्देश्यसहित अधिवेशनलाई ऐतिहासिक बनाउने तयारी गरेका छौं,” उनले बताए ।
प्रतिष्ठानका लुम्बिनी प्रदेश महासचिव रुकु पाण्डेका अनुसार अधिवेशनमार्फत नयाँ नेतृत्व चयन गर्नुका साथै लोकभजन, चुट्का तथा परम्परागत नेपाली संस्कृतिको संरक्षण, प्रवर्द्धन र पुस्तान्तरणका विषयमा गम्भीर छलफल गरिनेछ ।
उनले पछिल्लो समय आधुनिकताको प्रभावसँगै मौलिक लोकसंस्कृति ओझेलमा पर्न थालेको भन्दै यस्ता सांस्कृतिक अभियानले नेपाली पहिचान जोगाउन महत्वपूर्ण भूमिका खेल्ने विश्वास व्यक्त गरे । कार्यक्रममा राष्ट्रिय लोकभजन चुट्का संरक्षण प्रतिष्ठान नेपालका केन्द्रिय अध्यक्ष नारायण खनाल(लेकाली),केन्द्रिय अध्यक्ष अध्यक्ष प्रजापति पराजुली लगायतका कलाकारहरुको उपस्थित रहने आयोजकले बताएको छ ।
अधिवेशनमा विभिन्न जिल्लाबाट आउने कलाकारहरूले सांस्कृतिक प्रस्तुति समेत दिने तयारी गरिएको जनाइएको छ । कार्यक्रमले नेपाली मौलिक कला र संस्कृतिप्रति युवापुस्ताको आकर्षण बढाउने अपेक्षा गरिएको आयोजकको भनाइ छ ।
प्रतिष्ठानले सम्पूर्ण कला प्रेमी, शुभेच्छुक, संस्कृतिकर्मी तथा सम्बन्धित सबैलाई कार्यक्रममा उपस्थित भई अधिवेशन सफल बनाउन हार्दिक आग्रह गरेको छ ।