थानेश्वर अधिकारी ।
विश्व सङ्गीत दिवस–२०२६ को अवसर पारेर कपिलवस्तुमा आयोजित ‘प्रथम लुम्बिनी लोकतारा–२०८३’ को उपाधि रुकुम पूर्वका प्रतिभाशाली गायक समिर पुन ले जितेका छन्। राष्ट्रिय लोक तथा दोहोरीगीत प्रतिष्ठान नेपाल, लुम्बिनी प्रदेशको आयोजना तथा प्रतिष्ठान कपिलवस्तुको सह–आयोजनामा असार ७ गते आइतबार सम्पन्न प्रतियोगितामा उनले ११ जना प्रतिस्पर्धीलाई पछि पार्दै उपाधिमाथि कब्जा जमाएका हुन्।
लुम्बिनी प्रदेशका १२ वटै जिल्लाबाट अडिसनमार्फत छनोट भएका उत्कृष्ट प्रतिभाबीच भएको फाइनल प्रतिस्पर्धा निकै रोमाञ्चक बनेको थियो। प्रतियोगितामा रुपन्देहीकी बसन्ता खनाल द्वितीय तथा रोल्पाकी ज्ञानु परियार तृतीय घोषित भइन्।
उपाधि विजेता समिर पुनले नगद ५२ हजार २२२ रुपैयाँ, शिल्ड तथा प्रमाणपत्र प्राप्त गरे। त्यस्तै द्वितीय हुने रुपन्देहीकी बसन्ता खनालले ३२ हजार २२२ रुपैयाँ र तृतीय हुने रोल्पाकी ज्ञानु परियारले २२ हजार २२२ रुपैयाँ नगदसहित शिल्ड तथा प्रमाणपत्र प्राप्त गरिन्।
कार्यक्रममा राष्ट्रिय लोक तथा दोहोरीगीत प्रतिष्ठान नेपालकी केन्द्रीय अध्यक्ष रिता थापा मगर प्रमुख अतिथिका रूपमा सहभागी थिइन्। कार्यक्रममा चर्चित लोकदोहोरी कलाकारहरू राजु परियार, पशुपति शर्मा, प्रतिष्ठानमा केन्द्रिय सल्लाहकार खेम हमाल,राधिका हमाल, पूर्णकला बी.सी., शिव हमाल, शिरीष देवकोटा, दीपक गरौजा, सीता राना, रामकुमार नेपाली, ओम ज्ञवाली, दीपु मगर,प्रतिष्ठान रुपन्देहीका सल्लाहकार राधेश्याम राज भण्डारी लगायतको विशेष उपस्थिति रहेको थियो।
यसैगरी प्रतिष्ठानका केन्द्रीय सदस्य, लुम्बिनी प्रदेशभरिका कलाकार, १२ जिल्लाका अध्यक्ष तथा प्रतिनिधि, विभिन्न संघसंस्था, व्यवसायी, सहयोगीदाता,सल्लाहकार तथा पत्रकारहरूको उल्लेखनीय सहभागिता रहेको थियो।
राष्ट्रिय लोक तथा दोहोरीगीत प्रतिष्ठान नेपाल, लुम्बिनी प्रदेशका अध्यक्ष दामोदर बस्यालको अध्यक्षतामा सम्पन्न कार्यक्रमको सञ्चालन प्रदेश सचिव योगराज पोख्रेलले गरेका थिए भने प्रतिष्ठान कपिलवस्तुका अध्यक्ष असिम क्षेत्री ले स्वागत मन्तव्य व्यक्त गरेका थिए।
लोकसंस्कृति संरक्षण, नयाँ प्रतिभाको खोजी तथा लोकसङ्गीतको प्रवर्द्धन गर्ने उद्देश्यले आयोजना गरिएको प्रतियोगिताले लुम्बिनी प्रदेशका नवप्रतिभाहरूलाई राष्ट्रिय मञ्चसम्म पुग्ने महत्वपूर्ण अवसर प्रदान गरेको आयोजकले जनाएको छ।
