कपिलवस्तु, असार २२ ।  बाणगङ्गा नगरपालिकाले आर्थिक वर्ष २०८२/०८३ को तेस्रो तथा अन्तिम चौमासिक अवधिमा सम्पन्न विकास निर्माण, सेवा प्रवाह तथा प्रशासनिक गतिविधिबारे नागरिकलाई प्रत्यक्ष जानकारी गराउँदै सार्वजनिक सुनुवाइ कार्यक्रम सम्पन्न गरेको छ। कार्यक्रममार्फत नगरपालिकाले आफ्ना कार्यसम्पादन सार्वजनिक गर्नुका साथै नागरिकका सुझाव, गुनासा र जिज्ञासालाई प्रत्यक्ष रूपमा सुनेर उत्तर दिएको छ।

बाणगङ्गा नगरपालिकाको आयोजना तथा नेपाल पत्रकार महासङ्घ कपिलवस्तु शाखाको प्राविधिक सहयोगमा वडा नं. ८ स्थित मालिका खानेपानी तथा सरसफाइ उपभोक्ता समितिको सभाहलमा आयोजित कार्यक्रममा स्थानीय नागरिकको उल्लेख्य सहभागिता रहेको थियो।
सार्वजनिक सुनुवाइका क्रममा सहभागीहरूले सेवा प्रवाह, पूर्वाधार विकास, शिक्षा, स्वास्थ्य, कृषि, सामाजिक सुरक्षा, वातावरण संरक्षणलगायतका विषयमा आफ्ना जिज्ञासा, सुझाव तथा गुनासा राखेका थिए। उठाइएका विषयमा प्रमुख प्रशासकीय अधिकृत भक्तिराम मरासिनी, उपप्रमुख रीता कुमारी चौधरी तथा नगर प्रमुख चक्रपाणि अर्यालले तथ्यपरक र स्पष्ट जवाफ दिँदै आगामी दिनमा सेवा प्रवाहलाई अझ प्रभावकारी, पारदर्शी र नागरिकमैत्री बनाइने प्रतिबद्धता व्यक्त गरे।

कार्यक्रमको सहजीकरण गर्दै नेपाल पत्रकार महासङ्घ कपिलवस्तु शाखाका अध्यक्ष डिलाराम भुसालले सार्वजनिक सुनुवाइ लोकतान्त्रिक शासन प्रणालीको महत्वपूर्ण अभ्यास भएको उल्लेख गरे। उनले जनप्रतिनिधि र नागरिकबीच प्रत्यक्ष संवाद स्थापित गर्दै स्थानीय सरकारप्रतिको विश्वास अभिवृद्धि गर्न तथा सुशासन, पारदर्शिता र जवाफदेहितालाई संस्थागत गर्न सार्वजनिक सुनुवाइ प्रभावकारी माध्यम भएको बताए।

कार्यक्रममा नगरपालिकाले चालु आर्थिक वर्षको तेस्रो चौमासिक अवधिमा सम्पन्न योजना, बजेट कार्यान्वयन, सेवा प्रवाह, सामाजिक विकास तथा पूर्वाधार निर्माणका प्रमुख उपलब्धिहरू प्रस्तुत गरेको थियो। साथै नागरिकबाट प्राप्त सुझाव र प्रतिक्रियालाई आगामी नीति, योजना तथा कार्यक्रममा समावेश गरिने प्रतिबद्धता पनि जनाएको छ।
सहभागीहरूले सार्वजनिक सुनुवाइले स्थानीय सरकार र नागरिकबीचको सम्बन्धलाई अझ विश्वासिलो, उत्तरदायी र सहभागितामूलक बनाएको उल्लेख गर्दै यस्ता कार्यक्रमले जनप्रतिनिधि तथा कर्मचारीलाई थप जिम्मेवार बनाउनुका साथै नागरिकलाई आफ्ना सरोकार प्रत्यक्ष रूपमा राख्ने अवसर प्रदान गर्ने विश्वास व्यक्त गरे।

कार्यक्रम सफल बनाउन प्राविधिक सहयोग प्रदान गर्ने नेपाल पत्रकार महासङ्घ कपिलवस्तु शाखाप्रति बाणगङ्गा नगरपालिकाले आभार व्यक्त गरेको छ। साथै कार्यक्रममा सक्रिय सहभागिता जनाई रचनात्मक सुझाव दिने सम्पूर्ण नगरवासी, विशेषगरी वडा नं. ८ का स्थानीयबासीप्रति धन्यवाद ज्ञापन गर्दै आगामी दिनमा पनि नागरिक सहभागितालाई थप सुदृढ बनाउँदै सुशासन, पारदर्शिता र उत्तरदायी स्थानीय शासनको अभ्यासलाई निरन्तरता दिने प्रतिबद्धता जनाएको छ।