जितपुर। धार्मिक सद्भाव, भक्ति, आध्यात्मिक चेतना तथा सनातन संस्कृतिको संरक्षण र प्रवर्द्धन गर्ने उद्देश्यले कपिलवस्तु युवा भजन समूह ले ‘एकादशी विशेष युवा भजन साँझ–२०८३’ आयोजना गर्ने भएको छ।
आयोजकका अनुसार कार्यक्रम श्रावण ९ गते, शनिबार साँझ ६ बजेदेखि राति १० बजेसम्म जीतपुर–४, चोक, तोलिहवा रोड, कपिलवस्तु मा सञ्चालन हुनेछ। भक्ति, संगीत र आध्यात्मिक चेतनाले भरिपूर्ण यस कार्यक्रममा श्रद्धालु भक्तजनका लागि विविध धार्मिक तथा सांस्कृतिक प्रस्तुति समेटिनेछ।
कार्यक्रममा बटुकहरूमार्फत स्वस्तिवाचन, राष्ट्रिय कलाकार दिवाकर भण्डारी समूहको भजन प्रस्तुति, शिव ताण्डव नृत्य, भव्य महाआरती तथा कपिलवस्तु युवा भजन समूहको विशेष भजन प्रस्तुति मुख्य आकर्षणका रूपमा रहने आयोजकले जनाएको छ।
भक्ति, संस्कार र संस्कृतिलाई नयाँ पुस्तासम्म जीवन्त राख्ने उद्देश्यले आयोजना गरिएको यस विशेष कार्यक्रममा सहभागी भई धार्मिक तथा सांस्कृतिक अभियानलाई सफल बनाउन सम्पूर्ण श्रद्धालु, भक्तजन तथा सर्वसाधारणमा आयोजकले हार्दिक निमन्त्रणा गरेको छ।
कार्यक्रमको आयोजना कपिलवस्तु युवा भजन समूहले गरेको हो। श्रुङ्गीघाट सामुदायिक वन उपभोक्ता समूह तथा हिमवत प्रतिष्ठान नेपाल, कपिलवस्तु सहयोगी संस्थाका रूपमा रहेका छन्।
