जितपुर ।
मधुवन सामुदायिक वन उपभोक्ता समूहको सहयोग तथा सुपा देउराली दुर्गा मन्दिर सर्वभक्ति महिला मण्डलको आयोजना तथा सहयोगमा सञ्चालित १५ दिने नौमती बाजा बजाउने प्रशिक्षण सम्पन्न भएको छ।
नौमती बाजाको संरक्षण, पुस्तान्तरण तथा स्थानीयस्तरमा यसको प्रयोगलाई प्रवर्द्धन गर्ने उद्देश्यले सञ्चालन गरिएको प्रशिक्षणमा सहभागीहरूलाई बाजा बजाउने सीपसम्बन्धी प्रशिक्षण दिइएको थियो।
प्रशिक्षण समापन कार्यक्रममा मधुवन सामुदायिक वन उपभोक्ता समूहले पाँच वटा टोललाई एक–एक वटा नौमती बाजाको सेटसमेत सहयोग गरेको छ। यस सहयोगले स्थानीयस्तरमा नौमती बाजाको संरक्षण र प्रयोगलाई थप प्रोत्साहन पुग्ने अपेक्षा गरिएको छ।
सुपा देउराली दुर्गा मन्दिर सर्वभक्ति महिला मण्डलकी अध्यक्ष विष्णु के.सी.को अध्यक्षता तथा मधुवन सामुदायिक वन उपभोक्ता समूहका अध्यक्ष दीपक सापकोटाको प्रमुख आतिथ्यतामा कार्यक्रम सम्पन्न भएको हो। कार्यक्रमको सञ्चालन देवकला सुनारले गरेकी थिइन्।
कार्यक्रममा प्रमुख अतिथि दीपक सापकोटा, महिला नेतृ गीता भुसाल लगायतले शुभकामना मन्तव्य राख्दै नौमती बाजा नेपाली मौलिक संस्कृति र परम्पराको महत्वपूर्ण हिस्सा भएकाले यसको संरक्षणमा समुदायको सक्रियता आवश्यक रहेको बताए।
समापन कार्यक्रममा रेतबहादुर घर्ती, मानबहादुर सामै, बाबुराम परियार, प्रेम परियार, मनिकला सलामी, पत्रकार पूर्णचन्द्र परियारलगायतको उपस्थिति रहेको थियो। कार्यक्रममा सहभागी तथा अतिथिहरूका लागि दर खाने कार्यक्रमसमेतआयोजना गरिएको बताइएको छ।
