जितपुर । राष्ट्रिय लोक भजन चुड्का संरक्षण प्रतिष्ठान नेपाल, कपिलवस्तुको दोस्रो पूर्ण बैठक आज कपिलवस्तुको बैरियामा सम्पन्न भएको छ।
बैठकले प्रतिष्ठानले यसअघि गरेका गतिविधिहरूको समीक्षा गर्दै आगामी दिनमा सञ्चालन गरिने कार्यक्रम तथा कार्ययोजना तय गरेको छ। बैठकमा संस्थाको सांगठनिक सुदृढीकरण, आर्थिक पारदर्शिता तथा लोक भजन चुड्काको संरक्षण र प्रवर्द्धनका विषयमा महत्वपूर्ण छलफल भएको थियो।
सो अवसरमा कपिलवस्तुको तेस्रो जिल्ला अधिवेशनबाट निर्वाचित पदाधिकारी तथा सदस्यहरूलाई निर्वाचित प्रमाणपत्र प्रदान गरिएको थियो। साथै, नयाँ आजीवन सदस्यहरूलाई आजीवन सदस्यताको प्रमाणपत्रसमेत वितरण गरिएको थियो।
बैठकले प्रतिष्ठानको बैंक खाता सञ्चालन गर्ने, आर्थिक प्रतिवेदन प्रस्तुत तथा व्यवस्थित गर्ने र जिल्लाका विभिन्न पालिकामा पालिकास्तरीय समिति गठन गर्ने निर्णय गरेको जिल्ला अध्यक्ष बुद्धिसागर बेल्बासेले जानकारी दिए।
कार्यक्रममा प्रमुख अतिथिका रूपमा बोल्दै राष्ट्रिय लोक भजन चुड्का संरक्षण प्रतिष्ठान नेपाल, लुम्बिनी प्रदेशका उपाध्यक्ष थानेस्वर अधिकारीले प्रतिष्ठान कपिलवस्तुसँग जोडिएको इतिहास, वर्तमान अवस्था तथा आगामी दिनमा संस्थाले निर्वाह गर्नुपर्ने भूमिकाबारे जानकारी गराए। पछिल्लो समय लोक भजनप्रति आम मानिसको आकर्षण बढ्दै गएको उल्लेख गर्दै उनले भजन संस्कृतिलाई संस्थागत रूपमा अगाडि बढाउँदै सबै कलाकार, सर्जक तथा संस्कृतिकर्मीलाई एउटै अभियानमा जोड्नुपर्नेमा जोड दिए।
बैठकमा प्रदेश सदस्य माया पौडेलले विशिष्ट अतिथिका रूपमा मन्तव्य राखेकी थिइन्। कार्यक्रममा प्रतिष्ठान कपिलवस्तुकी महिला उपाध्यक्ष राधा पाण्डेले स्वागत मन्तव्य राखेकी थिइन् भने सचिव लिलापति घिमिरेले कार्यक्रम सञ्चालन गरेका थिए।
प्रतिष्ठान कपिलवस्तुका अध्यक्ष बुद्धिसागर बेल्बासेको अध्यक्षता, लुम्बिनी प्रदेश उपाध्यक्ष थानेस्वर अधिकारीको प्रमुख आतिथ्यता तथा प्रदेश सदस्य माया पौडेलको विशिष्ट आतिथ्यतामा बैठक सम्पन्न भएको हो।
बैठकले लोक भजन, चुड्का तथा मौलिक सांस्कृतिक परम्पराको संरक्षणसँगै नयाँ पुस्तालाई यसतर्फ आकर्षित गर्ने, संस्थालाई थप व्यवस्थित र सक्रिय बनाउने तथा जिल्लाभर संगठन विस्तार गर्दै लैजाने प्रतिबद्धता व्यक्त गरेको छ।
