थानेश्वर अधिकारी । भदौ १० गते भोटेकोसीमा आएको विनाशकारी बाढीबाट प्रभावित नागरिकका लागि कपिलवस्तुको बाणगङ्गा नगरपालिका वडा नं. ५ र ६ का स्थानीयवासीले स्वस्फूर्त रूपमा संकलन गरेको राहत सामग्री भदौ २१ र २२ गते नुवाकोट पुगेर वितरण गरेका छन्।
स्थानीयवासीको सक्रियतामा संकलन गरिएको ६० क्विन्टल खाद्यान्नसहित चामल, दाल, नुन, लत्ताकपडा, चाउचाउ, बिस्कुट लगायतका सामग्री नुवाकोटको विदुर नगरपालिका वडा नं. १, ६ र १० का बाढी प्रभावित नागरिकलाई वितरण गरिएको हो।
बाणगङ्गा–५ बाट २० क्विन्टल र वडा नं. ६ बाट ४० क्विन्टल खाद्यान्न संकलन गरिएको थियो। तिनघेरवा,अमौली, बैदौली, मनहरापुर, बनसकिया, भगलापुर र कोपवा लगायतका गाउँका स्थानीयवासीले खाद्यान्न तथा लत्ताकपडा सहयोग गरेका थिए।
त्यसैगरी लक्ष्मणघाट बोलबमधाम, सुभलक्ष्मी क्रसर उद्योग र जनप्रिय क्रसर लगायतबाट समेत नगद सहयोग प्राप्त भएको युवा व्यवसायी कृष्ण गैरेले जानकारी दिए।
राहत वितरण टोलीको नेतृत्व कृश गैरेले गरेका थिए। टोलीमा अर्पण खनाल, समीर भट्टराई, सिद्धान्त आचार्य, रामकिसुन थारु, अजय थारु र जयकरण थारु सहभागी थिए।
भदौ २१ र २२ गते दुई दिनसम्म प्रभावित क्षेत्रमा पुगेर राहत वितरण गरिएको गैरेले बताए। विपद्को समयमा टाढाको पीडालाई आफ्नै पीडा सम्झेर बाणगङ्गाका स्थानीयले गरेको सहयोगले मानवीय एकता, सामाजिक उत्तरदायित्व र सहकार्यको उदाहरण प्रस्तुत गरेको छ।
