काठमाडौं, भदौ १८
सत्तारुढ नेपाली कांग्रेसको १४ औं महाधिवेशनको प्रक्रिया आजबाट सुरु भएको छ । पटकपटक मिति सार्दै मंसिर ९ गतेदेखि १३ गतेसम्म महाधिवेशन आयोजनाको कार्यतालिका बनाएको कांग्रेसले आज अधिकांश जिल्लामा वडा अधिवेशन गर्न लागेको हो ।महाधिवेशन प्रक्रियाअन्तर्गत आजबाट देशभरका वडा अधिवेशन हुन लागेको हो।
तर, केही जिल्लामा भने क्रियाशील सदस्यता विवाद समाधान नभएका कारण आज अधिवेशन सुरु हुन सकेन । यद्यपी, ती जिल्लाका वडामा पनि भदौ २६ गतेसम्म अधिवेशन सम्पन्न गर्ने कांग्रेसले जनाएको छ । वडा अधिवेशन सम्पन्न गर्नका लागि निर्वाचन प्रतिनिधिहरु पुगेका छन् ।
यसैबीच वडा अधिवेशन सुरु हुनुअघि सभापति शेरबहादुर देउवाले भिडियो सन्देश जारी गर्दै लोकतान्त्रिक प्रक्रियाअनुसार सौहार्दपूर्ण ढंगले अधिवेशन सम्पन्न गर्न आग्रह गरेका छन् । महाधिवेशनमार्फत सशक्त कांग्रेस बनाउने अभियानमा लागेको बताउँदै देउवाले भनेका छन्, ‘पार्टीका साथीहरूले हरेक गाउँको मुद्दासँग आफुलाई गाँस्दै, हरेक टोलको भावनाको नेतृत्व गर्दै, ती सबै मुद्दा र भावना सम्बोधन गर्न बलियो कांग्रेस जरुरी रहेको सन्देश हरेक घर–घरमा पुर्याउनु हुनेछ।’
वडा अधिवेशन सकिएपछि भदौ २७ गतेबाट जिल्ला र प्रदेश अधिवेशन सुरु हुनेछ । कांग्रेसका हरेक क्रियाशील सदस्य वडा अधिवेशनका लागि मतदाता रहन्छन् । त्यसैकारण क्रियाशील सदस्यताको विषय कांग्रेसमा निकै पेचिलो बन्ने गर्छ ।
