लुदस, कपिलवस्तु
कपिलवस्तु जिल्लाको विजयनगर गाउँपालिकामा बृहत रक्तदान कार्यक्रम आयोजना गरिएको छ। गाउँपालिकाको आधारभूत अस्पताल बद्धौरमा सम्पन्न एक दिने रक्तदान शिविरमा १३० पोइन्ट रगत संकलन गरिएको छ।
कार्यक्रमको आयोजना राष्ट्रिय युवा संघ नेपाल विजयनगर गाउँ कमिटीले गरेको हो। उक्त कार्यक्रममा विजयनगर गाउँपालिकाको समन्वय र नेपाल रेडक्रश सोसाइटी बुटवल रुपन्देही तथा राष्ट्रिय स्वास्थ्यकर्मी संघ विजयनगरको प्राविधिक सहयोग रहेको थियो।
राष्ट्रिय युवा संघ कपिलवस्तु जिल्ला अध्यक्ष तिलक गिरीका अनुसार कार्यक्रम अत्यन्त उत्साहजनक रह्यो। रक्तदान कार्यक्रममा युवादेखि वृद्धसम्मको उल्लेखनीय सहभागिता देखिएको उनले जानकारी दिए।
कार्यक्रममा राष्ट्रिय युवा संघ नेपालका केन्द्रीय महासचिव सुमन पुरी प्रमुख अतिथि थिए। त्यस्तै, विजयनगर गाउँपालिका अध्यक्ष गोपाल बहादुर थापा विशिष्ट अतिथि तथा राष्ट्रिय युवा संघ कपिलवस्तुका जिल्ला अध्यक्ष तिलक गिरीलगायत अतिथिहरूको उपस्थिति रहेको थियो।
रक्तदानको महत्त्वलाई उजागर गर्दै “रक्तदान जीवनदान“ भन्ने मान्यता स्थापित गराउन उच्चतम सहभागिता भएको आयोजकले जनाएको छ।
कार्यक्रमको अध्यक्षता राष्ट्रिय युवा संघ विजयनगर गाउँ कमिटी अध्यक्ष तौलेश्वर खटिकले गरेका थिए। संचालन गाउँ कमिटी सचिव अर्जुन पोख्रेलले गरेका थिए। यो रक्तदान शिविरले विजयनगर र आसपासका क्षेत्रका स्वास्थ्य सेवामा सकारात्मक योगदान पु¥याउने विश्वास गरिएको छ।
