तानसेन । राष्ट्रिय लोक भजन चुडका संरक्षण प्रतिष्ठान नेपाल लुम्बिनी प्रदेश कार्यसमितिको बैठक पाल्पाको तानसेनमा सम्पन्न भएको छ।
बैठकमा प्रतिष्ठानका केन्द्रीय अध्यक्ष नारायण खनालले संस्थाको इतिहास, वर्तमान अवस्था र आगामी रणनीतिबारे चर्चा गर्दै संस्थालाई थप व्यवस्थित र प्रभावकारी बनाउँदै लैजानुपर्नेमा जोड दिएका छन्।
अध्यक्ष खनालले प्रतिष्ठान पछिल्लो समय देशका ६० जिल्लामा विस्तार हुनुका साथै विदेशमा समेत शाखा विस्तार भएको जानकारी दिँदै लोक भजन तथा चुडका संस्कृतिको संरक्षण र प्रवर्द्धनका लागि सबै तहका समितिहरू सक्रिय भएर लाग्नुपर्ने बताए।
उनले आगामी मंसिर १९, २० र २१ गते पोखरामा आयोजना हुने प्रतिष्ठानको चौथो केन्द्रीय महाधिवेशनलाई भव्य र सभ्य रूपमा सम्पन्न गर्न सबैको सक्रिय सहभागिता आवश्यक रहेको बताए। महाधिवेशन प्रतिनिधि छनोटका लागि २५ जना आजीवन सदस्य वा ५० जना साधारण सदस्य बराबर एक जना महाधिवेशन प्रतिनिधि रहने व्यवस्था गरिएको पनि अध्यक्ष खनालले जानकारी दिए।
बैठकले विगतका गतिविधिको समीक्षा गर्दै प्रतिष्ठानको आगामी कार्ययोजना, संगठन विस्तार तथा लोक भजन–चुडका संस्कृतिको संरक्षण र प्रवर्द्धनका विषयमा छलफल गरेको थियो।
कार्यक्रममा प्रतिष्ठानका लुम्बिनी प्रदेशका निवर्तमान अध्यक्ष काशीराम पोख्रेल, केन्द्रीय सदस्य तथा लुम्बिनी प्रदेश इन्चार्ज केदार सापकोटा र केन्द्रीय उपमहासचिव नारायण भुसालले शुभकामना मन्तव्य राखेका थिए।
बैठकमा लुम्बिनी प्रदेशअन्तर्गत विभिन्न जिल्लाका अध्यक्ष तथा सचिवहरूको सहभागिता रहेको थियो।
राष्ट्रिय लोक भजन चुडका संरक्षण प्रतिष्ठान नेपाल लुम्बिनी प्रदेश कार्यसमितिका अध्यक्ष रामबहादुर ओलीको अध्यक्षता तथा वरिष्ठ उपाध्यक्ष रुकु पाण्डेको सञ्चालनमा बैठक सम्पन्न भएको हो।
