काठमाडौं, बैशाख ९
नेकपा एमाले अध्यक्ष केपी शर्मा ओली र वरिष्ठ नेता माधवकुमार नेपालबीच बिहीबार पनि वार्ता भएको छ। राजधानीको मेरियट होटलमा वार्ताका लागि दुवै नेताहरू भेटवार्ताका लागि पुगेका थिए ।
विभाजनको संघारमा पुगेको एमालेका दुई शीर्ष नेताहरूबीच बुधबार मेरियट होटलमै सरप्राइज वार्ता भएर आइसब्रेक भएको थियो। बुधबार सकारात्मक कुराकानी भएकोले बिहीबार पनि वार्ता संभव भएको हो। बिहीबारको वार्ताबाट पार्टी एकताको पक्षमा केही सन्देश आउने बताइए पनि सम्वाद सकारात्मक नभएको प्रतिक्रिया नेपाल पक्षले दिएको छ।
सर्वोच्चको फागुन २३ को फैसलाअनुसार एमाले र माओवादी केन्द्र अलग अलग हैसियत कायम भएपछि एमालेभित्र फेरि आन्तरिक कलह चर्किएको हो। लामो संवादहिनता तोडिनु नै अर्थपूर्ण रहेको र यसले पार्टी एकताका पक्षमा सकारात्मक बल पुग्ने प्रतिक्रिया दुवैतर्फका नेताहरूले व्यक्त गरेका छन् । यसअघि चैत २ गते एमाले मुख्यालय धुम्बाराहीमा समूहिक वार्ता भएको थियो। तर त्यो वार्तापछि विवाद झन् चर्किएको थियो।
बिहीबार वार्ताका लागि मेरियट पुगेका अध्यक्ष ओली र नेता नेपाल दुवै प्रशन्न मुद्रामा देखिन्थे।तर वार्ता सकेर निस्कँदाको अनुहारको हाउभाउ खासै उत्साहजनक देखिएन। पार्टीका नेता तथा अर्थमन्त्री विष्णु पौडेलललगायतका दुवैतिरका केही युवा नेताहरुको विशेष पहलमा यो वार्ता संभव भएको हो। यसअघि युवा नेता योगेश भट्टराई बुधबार बालुवाटार पुगेर पार्टी एकता जोगाउन एमालेका अध्यक्ष तथा प्रधानमन्त्री केपी ओलीलाई आग्रह गरेका थिए।
बुधबारको वार्तामा पार्टीका नेता तथा अर्थमन्त्री विष्णु पौडेल पनि सहभागी थिए। केहीबेर वार्तामा सहभागी भएर पौडेल बाहिरिएपछि दुईजनाबीच एक्लाएक्लै वार्ता भएको थियो। पार्टी एकता जोगाउने विषयमा वार्ता केन्द्रित रहेको बताइएको छ। स्रोतले भन्यो, बुधबार भएको भेटमा मन माझामाझ त भयो तर बिहीबार कुरा अगाडि बढ्छ।ु
ओलीले नेपालसहित २७ सांसदलाई स्पस्टीकरण सोधेर कारबाहीको चेतावनी दिएपछि पार्टी विवादले उत्कर्ष लिएको हो। मंगलबार बसेको एमाले महाधिवेशन आयोजक समिति बैठकले नेपालसहित २७ जना संघीय सांसद र कर्णाली प्रदेशका ५ जना सांसदलाई पार्टीले किन कारबाही नगर्ने भन्दै दुई दिने अल्टीमेटमसहित स्पष्टीकरण सोधेको थियो। माधवकुमार नेपाल समूहले यो स्पष्टीकरणलाई पार्टी विभाजनको प्रयास गरिएको निष्कर्ष निकाल्दै संभावित कदम रोक्नका लागि अदालतमा समेत निवदेन दिएका छन्।
