माघ ४,
स्वास्थ्य तथा जनसंख्या मन्त्रालयले नेपालमा कोरोना संक्रमणको तेस्रो लहर माघ महिनाको दोस्रो साता (जनवरी २४ देखि ३० तारिखसम्म) उत्कर्षमा पुग्ने प्रक्षेपण गरेको छ । माघको दोस्रो साताको मध्यतिर संक्रमितको संख्या १९ हजारभन्दा बढी हुनसक्ने आँकलन गरिएको सम्वद्ध अधिकारीहरूले बताएका छन् । संसद्को शिक्षा तथा स्वास्थ्य समितिमा इपिडिमियोलोजी तथा रोग नियन्त्रण महाशाखाका निर्देशक डा. कृष्ण पौडेलले नेपालमा कोभिड–१९ को अवस्थाबारे प्रतिवेदन प्रस्तुत गर्दै कोरोना संक्रमणको तेस्रो लहरको प्रक्षेपित तथ्यांक सार्वजनिक गर्नुभएको हो । उनले दैनिक संक्रमितको संख्या १९ हजार बढी देखिएसँगै अस्पताल भर्ना हुने संक्रमितको संख्या पनि सापेक्षतामै बढ्ने तथ्याङ्क प्रस्तुत गर्नुभएको हो । डा. पौडेलका अनुसार त्यस समयमा करिब १३ हजार व्यक्ति अस्पताल भर्ना हुने र त्यसमध्ये करिब ३९४ जना गम्भीर र एक हजार बढीमा जटिल प्रकारको संक्रमण देखिने तथा करिब १० हजारमा सामान्य लक्षण मात्रै देखिने छ । डा. पौडेलले दोस्रो लहरमा भोगिएको अक्सिजन अभावलाई यो लहरमा दोहोरिन नदिन पनि मन्त्रालयले राम्रो तयारी गरेको छ । मन्त्रालयले भारतमा संक्रमण बढेसँगै नेपालका भारतसँग सीमा जोडिएका प्रदेशहरुमा पनि संक्रमणमा वृद्धि देखिएको तथ्यांक प्रस्तुत गरेको छ ।