रुपन्देहीमा आगामी निर्वाचनका लागि ७ सय ४ मतदान केन्द्र निर्धारण गरिएको छ । आगामी बैशाख ३० गते हुने भनिएको स्थानीय तहको निर्वाचनको लागि सो संख्यामा मतदान केन्द्र निर्धारण गरिएको जिल्ला निर्वाचन आयोगको कार्यालय रुपन्देहीले जनाएको छ । निर्वाचन कार्यालयले २ सय ८ मतदान स्थल तोकेको छ भने ९४ वटा मतदान केन्द्र थप गरी ७ सय ४ मतदान केन्द्र निर्धारण गरेको हो । निर्वाचनका लागि मुख्य निर्वाचन अधिकृतसहित १६ वटै पालिकामा निर्वाचन अधिकृत तोकिने प्रक्रियामा रहेको कार्यालयले जनाएको छ । सार्वजनिक भएको मतदाताको दाबी विरोध, विवरण सच्याउन र नामावली हटाउन फागुन २० गतेदेखि २६ गतेसम्म जिल्लाका सबै स्थानीय तहमा पठाएको र बिहीबार यो समयावधि सकिएपछि तथ्याङ्क आयोग पठाइएको निर्वाचन कार्यालय प्रमुख अयोध्या भण्डारीले जानकारी दिनुभयो । दाबी विरोध पछिको मतदातासंख्या नै अन्तिम हुने कानूनी प्रवाधान छ । निर्वाचनलाई लक्षित गरी यसपटक इलेक्ट्रोनिक माध्यमको प्रयोग गरी प्रचारप्रसार गरिने, त्यस्तै इन्टरनेटमा आधारित विद्युतीय माध्यमबाट निर्वाचनबारेमा जनचेनतामूलक र शिक्षामूलक सामग्री प्रसारण र प्रकाशन र सामाजिक सञ्जाललाई बढी जोड दिइने उहाँले बताउनुभयो